Champhai Dist. ah ruihhlo man leh thubuai ziahluh tam

Kumin April 28 leh nimin inkar chhungin Champhai District-ah Police ten ND&PS Act hnuaiah thubuai 14 ziaklutin Excise & Narcotics Department ten thubuai 12 an ziaklut bawk.

Nimin khan Champhai District Bawrhsap James Lalrinchhana hovin District Level Narco Coordination Centre (NCORD) Committee thutkhawm neih a ni a, he hunah hian thutkhawm hnuhnung ber April 28 leh June 21, 2023 inkar chhunga Police leh Excise & Narcotics Department te hmalakna tarlan a ni a, hemi hun chhung hian Champhai District Police te'n ND&PS Act, 1985 hnuaiah thubuai 14 ziaklutin hemi kaihhnawihah hian mi 19 man an ni a, an zinga 3 te chu ramdang mi an ni. Heng bakah hian Heroin gram 5506.7 (kg 5.51) man niin an thil man te hi Department lam chhut danin tualchhung market-a a hlut zawng Rs. 13,72,68,000/- a ni.

Hemi hun chhung vek hian Excise & Narcotics Department Champhai ten ND&PS Act, 1985 hnuaiah thubuai 12 ziaklutin hemi kaihhnawihah hian mi 24 an man a, ramdang mi an tel lo thung. Heroin gram 627, Department lam chhut dana tualchhung rate-a Rs. 7,52,580/- man, Alprazolam gram 628, Rs 5,700/- man bawr vel leh ruihhlo phurhna lirthei 6 (LMV 3 leh Two Wheeler 3) an man tel bawk. Heng bakah hian hemi hun chhung vek hian Assam Rifles COB Champhai in Heroin gram 600 bawr vel an man a, hemi kaihhnawihah hian thubuai pakhat ziaklutin mi 2 an man a. FDA, CMO Office Champhai in inkaihhruaina dan zawm lova lakluh leh kawl Codryl-T Cough Syrup 100 ml, bur 200 an man bawk a ni.