Nature Learning Centre dinna tur lung phum

Environment, Forest & Climate Change (EF &CC) Department changtu Minister TJ. Lalnuntluanga chuan nimin khan Champhai Zotlang hmun-hlui Botanical Garden-ah Nature Learning Centre (NLC) dinna tur lungphum a phum.

Nature Learning Centre leh Botanical Garden-te hi Project kalkawp leh inngheng tlat tur a ni a, kum 3 chhunga thawh zawh tur niin hemi atan hian cheng nuai 399.04 ruahman a ni a. Hmalakna tur zingah thawktu tur lak, Ttraining, Workshop, Seminar, Nature Tour leh adang buatsaih te, Amphitheatre Nature Trail, Mini Museum leh Orchidareum siam te, ram dang atanga dan lova nungcha leh thlai lakluh khawina tur siam te, nature camp-na tur hmanraw lei te, mipui zirtirna tur hmanraw duan chhuah leh Seed Orchard din te, Solar power bun te, thing hming chhinchhiahna leh herbarium siamte bakah tul dangte a tel a ni.

Nature Learning Centre (NLC) hi National Mission on Himalayan Studies-in Himalayan tlang dung State 8, ram zia danglam leh biodiversity chi hrang hranga hausa tak takte huamchhunga ramngaw, nungcha leh environment-te chak zawka humhalh a nih theih nana din a ni a. A thil tum tlangpui zingah nungcha leh ram leilung hausakna humhalhna tura ruahmanna siam leh mipui hnena zau taka puandarh te, midang hnena zirtirna pechhuak leh thei turte zirtirna pek te, khawmual leh tui-a ram leilung hausakna chi hrang hrang humhalh te, ram hausakna tichhe lo zawnga eizawnna neih te, hmun danga awm ve lo nungcha hrang hrang vang tawh leh mang mai hlauhawm chi humhalh te leh ramngaw tichhe zawnga eizawnna kalpui mek thlakna tur ngaihtuahte a tel a ni.