RD Minister in MSCU Assembly a hmanpui

Mizoram State Cooperative Union (MSCU) chuan nimin khan Annual General Assembly vawi 34-na Dawrpui Multipurpose Centre-ah hmangin RD Minister Lalruatkima chuan a hmanpui a ni.

He hunah hian Minister Lalruatkima chuan MSCU chu Mizoram-a Cooperative Society hrang hrang ten thawhhona tha an neih theih nana khaikhawmtu pawl pawimawh tak a ni tih sawiin, “Ram sum leh pai dinhmun siamthatna kawnga Cooperative Societies te pawimawhna hriain sawrkar laipui pawhin Ministry hran ‘Ministry of Cooperation’ a din a ni,” a ti a. Mizo nun zemawi – Huaisenna, Rinawmna leh Taimakna te chu Society Movement-ah tangkai taka sengluh theih a ni tih sawiin, Cooperative Society-te hmasawn nan thawhona tha a pawimawh thu a sawi a, tanrual hi chakna a ni tih hre reng turin a chah bawk.

MSCU hi Aizawl District Assistant Registrar of Cooperative Societies enkawlna hnuaiah March ni 29, 1975 khan din niin hnathawh dan kalphung duanga kaihruaitu leh a tul anga hma latu atan Board of Directors (BoD) din a ni a. BoD-ah hian President, Vice President leh MSCU CEO bakah Elected Board member pali (4) an awm a. Mizoram sawrkar leh State Level Cooperative Societies aiawhte an tel bawk a ni. Nimin a Assembly-ah hian kum 2023-2028 chhunga hruaitu thlanna neiin President-ah K. Lalchamreia chu thlan a ni.