Serchhip District Football-ah kan sang, hmabak erawh kan la nei tam - J. Sawma

Serchhip District Football Association (SDFA) chuan nimin khan General Body Meeting neiin he hun hmanpuitu MNF Publicity Board Vice Chairman J. Malsawmzuala Vanchhawng chuan Serchhip District chu Football-ah kan sang hle nia sawiin, hmabak erawh kan la nei tam hle niin a sawi.
Serchhip Sports Complex-a SDFA Officials’ Room-a SDFA General Body Meeting-ah hian MNF Publicity Board Vice Chairman chuan Serchhip District chu Football-ah kan sang hle nia sawiin, “Footballer tha tak tak kan chherchhuak tawhin Professional Footballer te mai bakah Academy a inzir mek te kan nei nual a, hlawhtlinna kan neih tawh hote a chhuanawm hle a, chutihrualin hmabak erawh kan la nei tam hle a ni,” a ti a. District FA in thahnemngai taka hma a lakna te, DFA hnuaia Zone hrang hrangin theihtawp an chhuahna azarah MFA pawh chak mai a ni tih sawiin, Local Level Tournamemt te thahnemngai taka kan buatsaih tang tang thin avang chauhin Mizoram Football pawhin hma a sawn thu a sawi bawk.

Mizoram Sawrkar dinglai, MNF Sawrkar chuan eptu pawlte pawhin an sawisel khawpa nasa in Sports Infrastructure din kawngah hma a la nia sawiin MNF Publicity Board Vice Chairman chuan, Phullem tam tak phah thar a nih thu leh a sawiseltute pawhin heng infrastructure din belhte chu an duh lo ni bik lovin sum senna tur dang pawimawh hmasa zawk a awm nia an hriat vang a ni ber tih a sawi a. Mizoram sawrkar Budget pangngai chhungah thil ropui tih tak takna tham sum a awm lo nia sawiin, Central-ah project, DPR chi hrang hrangte siamin chungte chu hmasawnna ruhrel kan din theih chhan a ni ber tih a sawi a. Infiamna hmunhma thar tam tak din belh mek a nih rual hian a enkawl zuina tur leh infiammite tih hmasawnna tur lam, Promotional a Fund erawh duh angin kan hmu tha lo hle tih sawiin, Sawrkar dinglai in harsatna tam tak a paltlang avang leh tunah pawh a la sut chhoh mek zel avangin sum leh pai a harsat dan a tarlang a, sawrkar in harsatna a tawh avanga Promotional Fund kan hmuh that tawk loh thu ah pawh Sports Association hrang hrangte pawhin sawrkar dinhmun kan hriatthiam hram hram rih a ngai tih a sawi bawk.

SDFA Annual General Body Meeting hi Sr. Vice President Zolianmawia chuan kaihruaiin an President Zomuana Hnamte chuan inlawmna thu a sawi a, Hony. Secretary Lalthlamuana hnen atangin Report ngaihthlak a ni bawk a, chawhnu lamah rorel a ni bawk.

Serchhip District Football Association (SDFA) hnuaiah hian Zone 6 a awm a, heng Zone hrang hranga tel lo DFA hnuaia awm Affiliated Club 1st Division-ah 8 leh 2nd Division-ah 18, an vaiin Club 26 an awm mek bawk a ni.