Mizoram ralmuanna chu State dang leh ramdangte awh ber a ni - Chief Minister

Chief Minister Zoramthanga chuan, “Mizoram ralmuanna chu State dang leh ramdangte awh ber a ni,” a ti.

Kum 1986-a Mizo National Front (MNF) leh sawrkar laipuiin remna thuthlung an ziah champha vawi 37-na puala thingtiak phunna hun nimin-a MINECO-a Open Gym bul-a neih ah Chief Minister Zoramthanga chuan kum 1986-a MNF leh sawrkar laipuiin remna thuthlung (peace accord) an lo ziah chuan Mizoram-ah remna leh muanna tluantling a thlen thu sawiin, “Mizoram-a kum 20 chuang buaina chu a reh thei ta a ni,” a ti a. Rambuai lai chuan Mizoram chu manganna raltitna authawm in a luahkhat thin thu sawiin, India hmarchhak mai nilo, Asia khawmualpuia chhimchhak (South-East Asia) a ram ralmuanglo ber a ni hial tih a sawi a, “Tunah chuan Hnam sipai huaisente zarah India rama State ralmuang ber leh midangte entawn ber a ni ta hial a ni,” tiin ropui a tih thu a sawi bawk.

Chief Minister chuan Mizoram ralmuanna chu State dang leh ramdang te awh ber a ni tiin Mizoram in thawnchhuah tur a neihte zinga hlu ber pakhat a nih thu a sawi a, Ramdang leh State thenawm atanga sahimna zawnga lo lutte chungchang pawh sawi langin, rilru leh taksa damna zawnga rawn kalte chu hmangaihna nena lo tuamhlawm turin kalkhawmte leh Zoram mipuite a chah a, Mizoram chu State ralmuang ber a nih zel theih nan thawhpuiah a sawm bawk a ni.

Khawvel boruak inthlak danglam nasat avanga khuarel chhiatna thleng fo laka him nan Environment humhalh a pawimawh thu pawh Chief Minister chuan sawiin, Mizoram pawhin theihtawpin hma a la chho mek tih a sawi a, remna ni puala thingtiak phun a ni chu lawmawm a tih thu pawh sawiin, he huna thingtiak a phun Thlado thing chu fei leh tlo tak anih avangin pi pu ten In sak nan an hman ber thin a nih thu leh Remna Ni puala phun a ni chu a inrem hle tih a sawi a, Thlado thing tiak thlangtu Forest Department-te a fak bawk.

Remna ni puala Ceremonial Planting hun hmanah hian Chief Secretary Dr. Renu Sharma leh GAD Commissioner & Secretary K. Lalthawmawia pawhin thu an sawi a, Principal Chief Conservator of Forest (PCCF) RK. Singh chuan Ceremonial Tree planting lawmpui nan Chief Guest leh Chief Secretary hnenah thingtiak a hlan a. Chief Minister chuan Remna Ni vawi 37-na pual hian Balloon 37 a thlawhchhuah tir a, Open Gym bulah Official dangte nen Thlado thingtiak hi phunin Conservator of Forest (CC) Lalrammawii Sailo chuan lawmthu a sawi bawk a ni.