Tripura-a pem tawh Bru te Mizoram E. Roll atanga paih hna chak taka kalpui a ni dawn

Tripura a inbengbel tawh, Mizoram Electoral Roll-a hming la chuang Bru te Mizoram Electoral Roll atanga an hming paih hna chu chak taka kalpui a ni dawn.

Election Department hotute sawi danin kumin kumtawp lama Mizoram Assembly inthlanpui buatsaih a nih hma ngeiin Tripura a pem tawh Mizoram Electoral Roll-a la awm Bru vote neite hming hi paih zo hman vek tura tanlak a ni a. Hemi chungchangah hian tunhnai ah inhmuhkhawmna buatsaih niin Mamit, Kolasib leh Lunglei District Bawrhsap, District Election Officer (DEO) nihna chelh bawkte chu chak taka heng mite paih hna thawk tura hriattir an ni a. Hemi hma hian DEO-te chuan Tripura Relief Camp a awm Bru vote neite kha a hranpa a dah lova Electoral Roll pui a thun phawt an rawt a. Mahse, hei hian Mizoram Electoral Roll a hming la chuang Bru vote neite hming paih hna a tikhawtlai thei dawna hriain, chutiang a ti lo chuan an District Electoral Roll a la chuangte hming chu paih nghal hmiah hmiah mai tura hriattir an ni.

Tun dinhmunah Tripura a inbengbel tawh Bru vote nei mi 4,554 chu Mizoram Electoral Roll atanga paih a ni tawh a, la paih loh hi vote nei mi 5,000 chuang an la awm a. Tripura State Election Commission lamin Bru vote neite an thun teuh tawh laiin an hming lo paih tura ERONet kaltlanga Mizoram Election Department an rawn ngenna hi a kal muang em em a. Hei vang hian Chief Electoral Officer tharin a hna a zawm hnu hian paih hmiah hmiah mai tura thutlukna hi siam a ni ta a ni.