MNF Returnee tana Maumual House Site Plan/Plot siam mek July thla chhunga peihfel tum a ni

Mizo Hnam Sipaite (MNF Returnees) te tana Revenue Department in Maumual, Chaltlang ram-a Survey an neih atanga House Site Plan/Plot an siam chu July thla chhung ngeia engkim peihfel tum a ni.

Mizo Hnam Sipaite tana Maumual, Chaltlang ram-a chenna In ngaihsak tura din, Maumual Development Committee for MNF Returnees chu nimin khan an Chairman leh Revenue Minister Lalruatkima hovin a Pisa-ah an thukhawm a, he hunah hian Minister Lalruatkima chuan kum 1986-a India sawrkar leh Mizo National Front ten inremna thuthlung an ziah hnua Hnam Pasaltha rawn hawte pualin Maumual ram hi theh a nih thu a sawi a. A hmun hi khang hun lai kha chuan hla deuh leh thlaler deuh anga a lan avangin chenna In sa duh pawh an awm mang lo nia a lan thu leh tunah erawh chuan chutiang ni tawh lovin, hmun tha leh rem tak a lo ni tawh tih a sawi a ni. Revenue Minister chuan Sawrkar in Ex-MNA te In leh lo ngaihtuahsak chu a ngaih pawimawh avangin theihtawp chhuahin hmalak reng a nih thu pawh sawiin, House Site Plan kum 1987-a siam tawh chu uluk leh tunlai thiamna changkang zawk hmanga House Site Plan hi siamthat a nih thu a sawi a, Land Revenue & Settlement Department chuan Surveyor tirin mumal taka Survey neih vek tawhin, Plot pawh siamfel anih thu leh siamrem ngai la awm te pawh siamrem nghal zel tura hmalak a nih thu a sawi bawk a ni.

Land Revenue & Settlement Minister chuan Maumual ram theh chu Phase hnih-a kalpui anih thu sawiin, Phase-I ah hian SEDP atangin Rs. 5,00,000 dah niin Phase-II kalpui thuai anih theihna turin hmalak tan mek a ni tih a sawi a, Maumual ramah khawpui felfai tak din a ni dawn tih sawiin, Mimal ram bakah hian mipui vantlang hmunhma tur – Anganwadi, School, Taxi Stand leh a tul dangte awmin, In tin chu kawngpui tha takin a pawh vek dawn tih a sawi bawk.

He thutkhawm a tarlan a nih danin Maumual ram chhunga ram nei in-report zat chu mi 863 an ni a. Report lut atanga House Site Plan chhunga awm tih hriat mai theih hi 452 awmin, Plan chhunga mi tih hriat mai theih loh 411 an awm mek a. Plot allotment siam zawng zawng chu 677 niin Plot cancel leh a ram neitute kuta pek 61 a awm bawk a. Nimin thutkhawm ah hian Revenue Department in Survey an neih atanga House Site Plan/Plot an siamte chu thlirho niin ruahmanna ang chuan July thla chhung ngeia engkim peihfel tum a ni.

Maumual Development Committee for MNF Returnees-ah hian Land Revenue & Settlement Minister chu Chairman niin nimin tthutkhawm ah hian Maumual ram awmna bialtu MLA C. Lalmuanpuia leh Land Revenue & Settlement, PWD leh DM&R hotute bakah MNF Returnees aiawh an tel bawk a ni.