Remna ni pualin Photo Exhibition buatsaih

Remna ni vawi-37na puala Information & Public Relations Department, Mizoram Journalist Association (MJA) leh Mizo Photographer’s Society (MPS) te buatsaih Photo Exhibition chu nimin khan Aizawl-a Vanapa Hall-ah neih a ni.

Photo Exhibition hi I&PR Minister Lalruatkima chuan hawngin Mizoram chu kum tam tak a buai hnu ah June ni 30, 1986 khan sawrkar laipui leh Hnam pasalthate zarah remna thuthlung ziah a nih tak thu sawiin, remna leh muanna nghahlelh em em chu neih a ni ta tih a sawi a. Kum 20 chuang rambuai ni thin kha remna leh muanna vawnghim tha ber a ni ta chu mipuite zar a ni, tiin Sawrkarin mawhphurna keng mah se mipui thawhpuina tel lo chuan remna tluantling neih theih a nih loh thu a sawi bawk.

I&PR Director C. Lalnunkima kaihhruain he hunah hian I&PR Minister chuan thangthar zel turte tan Mizo ziarang leh nihphung vawnthat a ngai hle tih pawh sawiin, Thlalak chu Hnam rohlu leh tihdanphungte vawnghimtu hlu tak a nih thu leh Hnam tipumkhata hmasawnna thlentu a ni tih hre reng turin kalkhawmte a chah a. Mizo nunphunga bet nghet tlat ramvah leh sava veh te chu tunlai thangtharte chuan Environment tan a pawi tih hriain thlalakna (camera) nen ram an vak tawh zawk tih a sawi a, thilsiamte nen lungrual taka cheng ho tur kan ni tih hre reng a, inrem taka nung ho turin kalkhawmte a chah bawk a ni.