Mizoram-a CSS hnuaia thawktu hrang hrang ten lungawilohna lantirin Badge dum an bel
All Mizoram CSS Employee Co-ordination Committee chuan hun rei tawh tak atangin Mizoram Sawrkar hnuaia CSS Employee ten an dinhmun hniam lutuk chawikan nan sawrkar dawrin lungawilohna tum engemawzat an lo lantir tawh thin tih sawiin, August 16, 2021 khan CSS hnuaia Employees hrang hrang te nawrna avangin Sawrkarin ‘Study Group on CSS’ a din sak thu an sawi a. He Study Group hian Mizoram Sawrkar hnuaia CSS Employee te hamthatna tur hrang hrang- Seniority based-a a tahtawl a dahngheh (regularised/absorbtion), CSS Employee te tana Recruitment Rules siam, CSS Employee ten Medical Reimbursement an neih ve theih dan tur siam sak, Transfer TA/DA siam sak leh rawtna hrang hrangte siam siamin, Study Group hian kum hnih (2) dawn a zirchian hnuin Recommendation siamin Sawrkarah a thehlut tawh tih an sawi a. Kum 2021-a Study Group din ni tawh si, tun thlenga tih hlawhtlin a la nilo chu All Mizoram CSS Employee Co-ordination Committee chuan pawi an tih thu an sawi a ni.
All Mizoram CSS Employee Co-ordination Committee chuan an lungawilohna lantir nan Department hrang hranga an hnathawhna hmun theuhah ni 3 chhung Badge dum hi an bel dawn tih sawiin, hemi hun chhunga thu lawmawm engmah an dawng lo a nih chuan June 22, 2023-ah an kal zel dan tur an rel leh dawn tih an sawi bawk.
AMCECC hian sawrkar laipui atanga CSS Fund lokal a hun takah State Nodal Agency a pekchhuah thin anih loh avangin hmasawnna hnathawhna tur sum leh hlawh a hun takah an la thei thin lo chu Central Guidelines angin ni 21 hma ngeiin a dawngtu tur Nodal Agency-ah pekchhuah thin an phut tlat tih an sawi bawk a. Heng an thu relte hi a hlawhtlin theih nan Mizoram CSS Employee zawng zawngte hmalakna ngaichang zel turin an in ngen bawk.
@@@@@@
Comments
Post a Comment