District Demand Comtt. din

Thenzawl-a tlawmngai pawl hrang hrangte leh Political Party hrang hrang aiawhte nizan hmasa a thukhawm chuan Thenzawl District Demand Committee (TDCC) dinin, an khua District Headquarters-a puan a nih ngei theihna atan hmalak an rel.
Nizan hmasa khan Vantawng Group YMA bultumin Thenzawl-a tlawmngai pawl hrang hrang leh Political Party hrang hrang aiawhte hi Van-tawng Run-ah an thukhawm a, he hunah hian Thenzawl District a pian theih nan tunhma lam atanga hmalak a lo nih tawh thin dan te, tunhnai ah Thenzawl Area MUP Conference leh Vantawng Group YMA Conference rorel-ah te Thenzawl District siam a nih theih nan sawrkara ngen a, hmalak nise tia passed anih tawh thu te, Mizoram leh Thenzawl hmalam hun zel tur ngaihtuaha Thenzawl chu khawpui lian zawk ni tura buatsaih zel a pawimawh thu bakah kawng hrang hrang ngaihtuaha Thenzawl District siam chu awm an tih thute tarlan leh sawiho a ni.


He thutkhawm a tel te hian Thenzawl District Demand Committee (TDCC) chu dinin, Thenzawl District a pian theih nan theihtawp chhuaha hmalak an rel a. Office Bearers tur insiamin Chairman-ah Vantawng Group YMA President C. Lalnunthara leh Secretary-ah Group YMA Secretary Lalhmingmawia Sailo te dah an ni a, Vice President-ah ZD. Dengkunga (MUP) leh Lalhmingliana Hrahsel (YMA); Asst. Secretary-ah Sailianpuia Sailo (MSU); Treasurer-ah R. Vanpari (MHIP) leh Fin. Secretary-ah Biak-nghinglovi (MHIP) te dah an ni a. Adviser atan Thenzawl a Political Party hrang hrang Block President theuh te an ruat bawk. Thenzawl District a pian theih nan tharum thawhna leh nawrhna huaihawt ang zawng ni loa, theihtawp chhuaha thuneitute hnena ngen leh an duhna lantir leh District huamchin tur angte ruahmanna siam a, khaw hrang hrangte thawhpuia sawm tha an ti bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man