Agro-Forestry leh Social-Forestry hnuaiah chhungkaw 148 te tanpuina pek an ni

Nimin khan Kolasib-ah ‘Agro-Forestry leh Social-Forestry’ hnuaia hamthatna dawng tura thlan mi 148 te hnenah tanpuina hmasa Rs. 15,000/- theuh semchhuah a ni.

Green India Mission hnuaia kuthnathawktute ramngaw siam belhna tur leh sum a chantir theih thing, rah nei chi phun belhna kawng a hmalakna tur ‘Agro-Forestry leh Social-Forestry’ hnuaia tanpuina semna hun Parish Hall, Kolasib-a neih hi EF&CC Minister TJ. Lalnuntluanga chuan hmanpuiin khawvel thang zel avanga khawsak leh eizawnna avangte in kan ramngaw leh a chhunga nungchate nekchepna leh sik leh sa inthlakthlengna buai nasa lutuk tur ven nan Green India Mission hnuaiah ramngaw awmsa humhalh leh siam belhna tur ‘Agro-Forestry leh Social-Forestry’ kalpui a nih thu a sawi a, hemi hnuaia Kolasib District atanga tanpuina dawng tur mi 237 an awm chu lawmawm a tih thu sawiin, Khawvel hi chenna tlak a siam tur chuan ramngaw, tuihna leh ramsa humhalh a pawimawh thu leh heng te hi mitin mawhphurhna a nih thu leh Mizoram chhunga ramngaw awm te venhim nan leh ramngaw siam belh nan kum 1999 atanga Green Mizoram Day hman a nih thu te a sawi bawk.

EF&CC Minister chuan ramngaw leh nungcha humhalh kawnga Mizoram Sawrkar hmalakna tithuanawptu leh awmze nei lo a seltu ni lova tichaktu leh tihlawhtlin puitu ni turin Green India Mission hnuaia hamthatna dawngtute chu a chah a, leilung hausakna chu mi tin mamawh leh intawm a nih angin EF&CC Department leh khawtlang mipui inkarah thawhhona leh tanrualna tha a awm a tul thu pawh sawiin, EF&CC Department hmalakna in Kolasib District khawpui chhung leh a vel ah ramngaw siamna tur ‘Nagar Van’ Project te, Botanical Garden leh JICA kaltlangin Biodiversity Conservation & Forest Enrichment Project kalpui tura ruahmanna siam mek a nih thu te a sawi bawk.

He hunah hian Kolasib DFO Margaret Lalramchhani IFS chuan Green India Mission hnuaia ‘Agro-Forestry leh Social-Forestry’ hian mahni huan neihsa a thing humhalh leh an eizawnna kawnga pui thei tur thing rah neih chi phun belh tura hmalak chu a thil tum ber a nih thu leh he hmalakna hi ramngaw siam belh kawng a thil tangkai tak a nih tur thu a sawi a. he hunah hian Kolasib, Kawnpui, Bualpui leh Bairabi atangin mi 148-te hnen ah 1st Installment Rs. 15,000/- ttheuh hlan an ni bawk. Hamthatna dawngtute hian an huan Hectare 1-a zauah thing rah nei chi 1100 zel an phun ang a, thingtiak hi EF&CC Department-in a thawnin an pe anga, a hmunhma enkawl nan Rs. 28,500/- an dawng dawn a ni. Heng hmalakna te hi a bialtu Range Officer-ten an vilpui ang a, hmalakna hmasa hian Kolasib District chhung ram Hectare 237 huam tur a ruahman a ni.