Raj Bhavan-ah West Bengal State dincham lawm

West Bengal State din champhaphak lawmna chu nimin khan Raj Bhavan Durbar Hall-ah Governor Dr. Hari Babu Kambhampati hovin neih a ni.

Ek Bharat Shreshtha Bharat hnuaia hmalakna ah Ministry of Home Affairs chuan State tina Raj Bhavan te chu State Day apiangah lawmna siam turin a lo hriattir tawh anga he hun hi kalpui a ni a, India rama State upa leh pawimawh ber zinga mi, West Bengal hi June 20, 1947-a Bengal Legislative Council thukhawmin thutlukna a siam angin a rawn piang a ni.

Governor chuan State dang te dincham an lawmsak chho ta zel chu hmalakna tha tak nia a ngaih thu sawiin, State danga cheng te nena inhmelhriat tawnna tha zawk a lo awm theihna atan leh India cheng te kan inpumkhatna tinghettu atana thil tangkai a nih thu a sawi a. West Bengal State chungchang leh a chhunga cheng te, a nunphung leh khawsak phung te sawiin, West Bengal chu State upa tak, a chhunga cheng te pawh India ram tana thawh hlawk tak tak te an ni tih sawiin, Zalenna sualtu ropui tak tak te, zirna lama mithiam leh ropui tak tak te leh ram hruaitu langsar tak tak te West Bengal atangin an lo chhuak tawh thin tih a sawi a. India ram ropuina atan leh tun dinhmun a thlen theihna chungchangah hian Bengal mite’n an thawh hlawk hle niin a sawi a. Khawi State a cheng kan nih pawhin kan awmna hmun apiangah India ram ropui zual zelna atan leh inpumkhatna atan theihtawp chhuahtu kan nih a pawimawh thu a sawi bawk.

He hunah hian West Bengal State dinhmun, a chhunga cheng te leh hmasawnna te Video-ah chhuahin West Bengal Culture kaihnawih thil te zai leh lam hmangin an entir a ni bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man