Champhai-a ASF leng mek chungchang thlirho a ni

Nimin khan Champhai-ah an District chhung khaw hrang hranga Vawk hri, African Swine Fever (ASF) leng dinhmun leh a darh zel loh nana hmalak dan tur bakah Vawk thi sawngbawl kawnga hmalak tulte ngaihtuah a ni.

Champhai District Level Committee on African Swine Fever & Other Trans-Boundary Animal Diseases (TADs) hi nimin khan Champhai DC Conference Hall-ah District Bawrhsap James Lalrinchhana hova thukhawmin ASF avangin Champhai District-ah nikum ah Vawk engemaw zat an thih thu leh hemi avang hian cheng vbc. 65 dawn hloh anga chhinchhiah a nih thu Bawrhsap chuan a sawi a, kumina ASF rawn leng thar leh hi ngaihthah lova theihtawp chhuaha khuahkhirh tuma hmalak tlan a tul thu a sawi bawk.

District Animal Husbandry & Veterinary Officer Dr. B.Lallawmsanga chuan ASF hrileng chuan Champhai District a chenchilh mek thu leh Department lama report loh Vawk thi engemaw zat a awm nia hriat a nih thu a sawi a. Champhai District-ah vawk 6,000 chuang an awm mek nia chhinchhiah a nih thu a sawi bawk.

Champhai AH&Vety Department tarlan danin ASF hrileng thawhkhatna (First Wave) chu May ni 9, 2021 khan Champhai District Zokhaw-thar-ah hmuhchhuah niin Khua/Veng 11 ah a darh a, Vawk 549 in an thihpui a ni. ASF thawh hnihna (Second wave) chu nikum February ni 4 khan Champhai Electric Veng atanga hmuh leh tan niin Khua/Veng 41 a nghawng a, Vawk thi leh suat 8,454 a awm bawk a ni.

ASF thawh thumna (Third Vave) chu kumin April ni 29, 2023 khan Ngur khuaah report a ni a, Veng/Khua pathum Ngur, Zote leh Champhai Vengsang-ah Vawk thi 86 leh fimkhur thu-a suat 182 te awmin, Vawk thi leh suat tawh zawng zawng zat hi 268 a tling tawh a ni.