RURBAN Commercial Centre pahnih hawng

Rural Development Department changtu Minister Lalruatkima chuan nimin khan Puilo RURBAN Commercial Centre leh Chawngtlai RURBAN Commercial Centre te a hawng.

Heng RURBAN Commercial Centre hawnna hunah hian RD Minister chuan thingtlang khua in hma an sawnna turin Scheme hrang hrang kaltlangin Rural Development Department in hna an thawk tih sawiin, India ramah SPMRM Cluster 300 awmin Mizoram in Cluster 4 - Aibawk RD Block, Khawzawl RD Block, Thingsultliah RD Block leh East Lungdar RD Block kan neih thu a sawi a. Thingtlanga cheng ten eizawnna ngelnghet leh tlo an neih theihna tura kawng kawhhmuh chu he Mission hian a tum ber a nih angin heti lam hawi zawng hna tam tak an thawh thu leh a hlawhtlinna kan hmu chho zel chu a lawmawm takzet a ni, a ti a. Khawvel hmasawnna kawnga ke kan penna ah vawilehkhatah khawvel dang hmasawnna kan nei nghal vek thei lova, keimahni theihna leh inbuatsaihna nen kalkawpin kan phak chin chinah rualpawl turin theihtawp kan chhuah zel a ni, a ti bawk.

Nimin-a hawn tak RURBAN Commercial Centre pahnih te hi cheng nuai 292.98 senga sak ve ve niin Ministry of Rural Development, Govt. of India in Shyama Prasad Mukherji Rurban Mission (SPMRM) kaltlanga sum an rawn pek hmanga sak niin Puilo RURBAN Commercial Centre hi Lyrics Construction Pvt. Ltd., Tuikhuahtlang, Aizawl leh Chawngtlai RURBAN Commercial Centre hi Mizoram Technocrats Company Pvt. Ltd. Tuikhuahtlang, Aizawl te sak a ni.

Heng Building thar Ground Floor-ah hian Processing Unit (Sorting, Washing, Grading & Packaging), Controlled Temperature Storage Room (Cold Storage), Hygiene Zone, Grain Storage Room, Fruits & Vegetables Storage Room, Common Changing Room, Men & Women Wash Room pakhat ve ve, Kitchen-cum-Restaurant, Market Shed, Unloading Dock 2 (fruits - Vegetables), Loading Dock leh vantlang inthiarna hmun a awm a. A chung zawk Mezzanine Floor chu Administrative Office atana hman tur a ni.

Puilo leh Chawngtlai RURBAN Commercial Centre-ah hian bungraw hralh tur bukna leh thawnchhuak tura siam tura hmanraw pawimawh khawl chi hrang hrang 20 zet dah niin Tui dahkhawlna tur Tuizem bakah ruahtui khawlna tur dah tel a ni a, 5 KVA Generator dah a nih bakah, Processing Unit leh Storage vilna tur website development siam a ni a. Overnight Truck Parking Area siam a ni bawk.

Nimin-a heng Commercial Centre hawnna hun hi MzSRLM-a CEO H. Lalchhandami chuan kaihruaiin Khawzawl BDO Lalthakima Chhangte chuan Technical Report a pe bawk a ni.