Sa leh Artui-a intodelh nana Department hmalakna in rah tha a chhuah niin hria

AH&Vety Department changtu Minister Er. Lalrinawma chuan Mizoram in Sa leh Artui-a kan intodelh nana Department-in hma alo lak tawhna te chuan rah tha a chhuah nia a hriat thu a sawi.

AH&Vety Minister hian nimin khan Ramrikawn-a Ranchaw herna hmun, Animal Feed Plant leh Tanhril-a Ar note awpkeuna hmun, Zoram Poultry Development Society Hatchery Farm te tlawhin, heng hmuna thawktute chu Sa leh Artui-a kan intodelh nan theihtawp chhuah zel tura chahin, Animal Feed Plant chuan ranvulhtu mamawh zawng zawng phuhru lo mah se phai lam atanga lolut ranchaw aiin a man a tlawm zawk avangin ranvultu tan malsawmna a ni thei a. Chutiang bawkin Ar note awpkeuna hmunhma tihlen mek zawh hunah Ar vulhtuten Broiler chitha leh man tlawm zawka an lei theihna a siamsak ngei a beisei thu a sawi bawk.

Ranchaw herna hmun, Animal Feed Plant hi kum 2003 bawr vel khan din niin kum 2018 khan NABARD hnuaia RIDF XX sum cheng nuai 523.53 sengin ranchaw herna khawl leh hmunhma dangte bun belh a ni a. Animal Feed Plant a ranchaw herna khawl pahnih te hian ni khat ah ranchaw quintal 120 vel an herchhuah thin a, Layer leh Broiler chaw chi thum ve ve te, Vawk chaw leh Bawng chaw atan feed te pawh an siamchhuak a ni. Sawrkarin Revolving Fund cheng nuai 30 a pek atangin Animal Feed Plant hi amah leh amah a inchawm a, a enkawl turin Department in Management Committee a siam bawk a ni.

Zoram Poultry Development Society (ZPDS) INDBRO Poultry Hatchery Farm, Tanhril hi AH&Vety. Department Farm hlui Regional Broiler Chick Farm, Tanhril hmunah NABARD RIDF XVII project ‘Establishment of Hatchery Farm at Tanhril, Aizawl’ sum hmangin bul tan that a ni a. May 2015 khan hawn a ni. ZPDS Farm hi ama ke-a a din theih nan kum 2015 khan AH&Vety Department in Capital fund/Revolving fund Rs. 40,00,000/- a pe a. He fund hi Parent Stock leh Ar chaw lei nan bakah, Electric/Tui bill, Staff hlawh, Damdawi leh Farm inrelbawlna a tul apiang thawh nan hman thin a ni.

Miipui mamawhna a san em avangin ZPDS Hatchery Farm tilian tur hian July 20, 2020 khan NABARD (RIDF)-ah kar khata Ar note 40,000 thar theihna tur Project thehluh a ni a, November 17, 2020 khan Planning Department hnuaia Special Assistance to State For Capital Expenditure (SASCE) ah Project dang thehluh leh a ni bawk a. Heng hna hi tunah hian thawh mek a ni a, hun reilote ah zawhfel beisei a ni. Tun thlengin ZPDS Hatchery Farm hian Artui 25,70,740 leh Ar note 16,98,100 a tharchhuak tawh a, Sawrkar ah Revenue Rs.32,85,679.89 a chhung lut tawh bawk a ni.