Zofate rorelna pakhat hnuaia awm la bei reng

MNF President leh Chief Minister Zoramthanga chuan, “Tun thlengin MNF chuan Zofate rorelna pakhat hnuaia awm hi kan la bei reng,” a ti.

Nimin-a MNF Tawi East Block Conference Saitual Auditorium-a neih a hmanpuina ah MNF President leh Chief Minister Zoramthanga chuan tunhnaia Manipur Chief Minister nen an inbiakna chungchang sawiin, “MNF hian a din tirh, October ni 22,1961 atangin Zohnahthlak inzawmkhawmna chungchang kan lo buaipui daih tawh tih thu ka hrilh a. Tun thlengin MNF chuan Zofate rorelna pakhat hnuaia awm hi kan la bei reng a. Pathian in mak tak leh hriatthiam harsa takin min hruai zel a ni,” a ti a. MNF hian harsatna tam tak a lo paltlang tawh thu leh tun thlengin harsatna chu a la tawk reng tih sawiin, “Amaherawhchu, 'Pathian leh kan ram tan' tih thupui kan en tlat a. Hruaitute that leh fel vang ni lovin, Pathian in harsatna a ta min dawmkang zel thin a ni,” a ti a. “'MNF hi an ral mai dawn' ti thintute leh nuaibo tumtute chu anmahni an ral vek tawh zawk,” tiin, “MNF-in engmah a tilo ti thinte hian MNF sawrkar hnuaia hmasawnna tam tak te hi en rawh se,” a ti a, MNF mipuite chu engemaw avanga hnual mai loivn, phur tak leh thahnemngai taka bei zel turin a fuih a, “MNF hi a sawrkar leh ngei dawn a ni,” a ti bawk.

He hunah hian bialtu MLA leh MNF Adviser R. Lalzirliana pawhin Tawi bial-ah hmasawnna liantham tam tak hmuhtur a awm leh MNF sawrkarin sum harsa tak kara Saitual District implement a ni chu a lawmawm hle tih a sawi a.  “Nationalist CM kan nei hi a chhuanawm hle a. MNF a sawrkar leh ngei a rinawm a ni,” a ti bawk.