Supply Department leh MSFC Member ten National Food Security Act, 2013 an sawiho

Supply Minister B.Lalchhanzova hovin nimin khan a Pisa-ah Supply Department hotute leh Mizoram State Food Commission Member ten National Food Security Act, 2013 chungchang an sawiho.

He sawihona hunah hian Supply Minister chuan National Food Security Act, 2013, Section 16 in State tinah State Food Commission din a phut angin Mizoram-ah pawh October, 2018 khan din a lo ni tawh tih a sawi a. Chhan hrang hrang avangin hun hmasa lam atang khan MSFC chu anih tur ang ni phalo leh a tihtur te ti lovin alo awm tawh thin nia sawiin, hei hi ZPM sawrkar chuan siam dik a tum thu a sawi a ni. 

He thutkhawmah hian Member Secretary mumal taka ruat awm lo chu siam that nise ti-a rel a ni a. Distrcit Level-a mipuiin NFSA kaihhnawih a buhfai lak leh Ration card chungchanga harsatna an neih te an thlenna tur District Grievance Redressal Officer atana The Mizoram Food Security Rules, 2017 in a ruat Additional DC te chu helam hawia Awareness leh Training te buatsaih sak nise tih rel niin mipui nawlpui in buhfai sem, Ration Card chungchang leh NFSA kaihhnawiha an vuivaina leh hriatduh te an thlenna hmun tur an hriat theih nana inzirtirna te uar taka kalpui nise tiin an rel bawk. 

He hunah hian Food Commission Chairman HL. Rochungnunga leh Member dang pathum bakah FCS&CA Department-a Secretary Teresy Vanlalhruaii, Additional Secretary Lalhmunsanga Hnamte leh Director Saizikpuii te an tel a ni.