Thlai thar thawnchhuah tur sawngbawl dan tur zirho

Agricultural and Processed Food Products Export Development Authority bultumin thlai tharchhuah State pawna thawnchhuah hmaa sawngbawl dan tur zirhona neih a ni.

He Workshop hi Aijal Club-a neih hi Prof. Dr. NC. Saha, Former Director, Indian Institute of Packaging, GOI & Chairman, Foundation for Innovative Packaging and Sustainability (FIPS) in a kaihruai a, he hun hmanpuitu Agriculture & Farmer's Welfare leh Horticulture Department changtu Secretary Ramdinliani chuan Mizoram Agriculture Marketing Board leh APEDA ten nen tangho a hmalak a ni tur chu phurawm a tih thu sawiin, thlai thar vawnthata sawngbawlna kawngah hmalakna a awm chho chu lawmawm a tih thu a sawi a. Hei bakah hian inkalpawhna tha neih a pawimawhzia a sawi bakah Workshop booklet a tlangzarh nghal bawk a ni. 

He hunah hian Horticulture Department Addl. Director L. Lalhmingmawia pawhin Mizoram atanga thlai thawnchhuah chungchang leh sawngbawl that a tulzia a sawi a. Mithiam hrang hrangten kalkhawmte zirtirna an pe a ni. 

Mizoram thlai thar, abikin Mizo Hmarchate, Sawhthing, Aieng leh Anthurium te Mizoram pawnna thawnchhuah hmaa sawngbawl dan inzirtirna Workshop hi Agricultural and Processed Food Products Export Development Authority (APEDA) bultumin Department of Commerce, Ministry of Commerce and Industry leh Mizoram Horticulture Department ten an buatsaih a ni.