Lengpui Airport Forum ten Lengpui Airport IAF kut-a hlan tum mek hnuhkir an duh thu an sawi

Indian Air Force (IAF) kuta Lengpui Airport hmunhma engemawzat Mizoram sawrkarin hlan a tum tha tih loh avanga pawl din, Lengpui Airport Forum chuan IAF kut-a Airport hlan chu mipuite tana tha lo turah ngaiin hlan lo tur leh hnukkir leh hram tura an duh thu sawiin, AAI kut-ah hlan ni zawk se an duh thu an sawi bawk.

Nimin-a Aizawl Press Club-a thuthar thehdahtute an kawmnaah Lengpui Airport Forum Convener Lalthuamliana chuan cheng vbc. 97 senga din Lengpui Airport chu Mizoram tan State pawn leh ramdang kan inkalpawhna gateway pawimawh tak a ni tih sawiin, “Kum 7 kalta (2017- 24) Civil Aviation Budget (Aiport enkawltu Department) kan en chuan cheng vbc. 140.51 a hloh,” a ti a. Hei vang hian sawrkar chuan midang kut-a hlanchhawn dan zirchiang tur leh ngaihtuah turin Working Committee a din thu leh Lengpui Airport la tura Mizoram sawrkarin Airports Authority of India (AAI), Indian Air Force (IAF) bakah Private player a dawr hnuah AAI leh Adani Group ten an hnawl avangin IAF-a hlan chu Working Committee ten tha an tih ber avanga Cabinet pawhin a pawmpui tawh a ti a. Lengpui Airport chu IAF kuta hlan pawh ni se, thu delhkilh an neih atanga thlirin Mizoram sawrkarin tih tur tam tak a la neih dawn tho avangin an chhuanlam ber sum hloh chu a kian phah a rinawm loh niin a sawi.

Lengpui Airport Forum Convener chuan, nikum October ni 16-a Council of Minister thukhawmin IAF kuta Lengpui Airport hlan chungchang an ngaihtuah tuma an thutlukna mipui hriattura thuchhuah siam a ni lo chu mak an tih thu sawiin, kum 2011 khan IAF te chuan Lengpui Airport chu Fighter thuhruk nan an dil tawh thu leh sawrkar laipui chuan IAF inkulh nan Lengpui Airport hi an awt viau ni a an ngaih thu a sawi a.  Airport mipui tana tangkai taka hman chu an dah pawimawh ber thu leh IAF kuta hlan turin nawr mah se sawrkarin an pawm tur a ni lo tih an sawi a ni.

He huna tarlan anih danin, Mizoram sawrkarin a ruahman dan chuan Airport Runway leh Air Traffic Control bakah Runway sir lehlam ram zawng zawng IAF in an chang anga, a bak zawng Terminal Building,Security, Fire Services leh ticketing leh a dangte Mizoram Sawrkar kutah a la awm zui dawn a. Hemi awmzia chu IAF in remchang an tih dan angin an kuta awm, Runway leh ATC hi Civilian Flights atan a hawh tir ve dawn tihna a ni tih an sawi a. Hei vang hian AAI-in kan anpui dangte an enkawl ang bawka Lengpui Airport min laksak turin Political Level-a Central sawrkar, PM leh Aviation Minister hnenah thlen tura an duh thu te a sawi bawk.