Mipui tana hna thawk thin party kan ni - Dr. K. Beichhua

BJP Mizoram-a State Core Group Member Dr. K. Beichhua MLA chuan BJP chu Manifesto anga Mipui tana hna thawk thin party an nih thu a sawi.

BJP Mizoram hian nimin khan Aizawl-a an party Office-ah Karthar Inhlanna leh Political Session neiin he hunah hian Dr. K. Beichhua chuan Mamit District lama VC Inthlanna atana an hmalakna te a sawi a, Pathian zarah hmasawnna tha zawk an neih zel an beisei thu sawiin, “Mizoram mipuite pawh hian BJP hi Political Party pakhat, ZPM, MNF, Congress te ang tho kan ni tih an hria a, nimahsela in an lohna kan neih thung a; BJP chu Manifesto anga Mipui tana hna thawk thin party kan nihna hi a ni,” a ti. He hunah hian Village Council leh Local Council Election lo awm turah Seat 195 an chuh thu tarlan a ni bawk.

Dr. K. Beichua chuan Opposition MLA ni mah se sawrkar chu a pawng a taka do ngawt leh sawisel ngawt chu an tih tur a ni lo tih a sawi a, “Constructive Opposition MLA kan ni a, Mizoram Sawrkar pawh Mizoram hmasawnna tur atan chuan theihtawp chhuah a puih hi kan inhuam a ni,” a ti a. National Highway kawngchhhia leh Mizoram kawng chhia chungchang sawiin, “Chhim tawp atanga Hmar tawp thlenga ka zin kual hian mi thenkhatin kawng avanga harsatna an sawi chu ‘Ka hnungzang a na, ka sil themthum tihte a ni thin a, nimahsela kan kawngpui vanga ka natna neih erawh chu ka rilru na hi a ni,” a ti a. “Mipui lam pawh hian Thal lai a nih vanga ngawi mai mai lovin, Fur laia kan ngaih pawimawh ang aia nasa zawk hialin kawngpui siam that a nih theih nana Sawrkar au eih turin kan insawm bawk a ni,” tiin sawrkar chu kawng chungchang ah hma la turin a ngen bawk.