Republic Day Volleyball khel zo in lawmman sem a ni

Republic Day lawmna chi khat atana buatsaih Volleyball Tournament chu Inrinni khan khelh zawh niin Hmeichhia-a New Serchhip VC leh Mipa-ah Chhiahtlang VC te an Champion.
Serchhip District Volleyball Association (SD-VA) buatsaiha Serchhip Chhim Veng Volleyball Court-a khelh Republic Day Volleyball DC Running Trophy hi Inrinni khan Final khelh niin Hmeichhia-ah New Serchhip VC chuan Darnam VC chu 3-1 (25-13) (18-25) (25-21) a hnehin an Champion a, Champion Team in Trophy leh Rs. 7,000/- dawngin pahnihna in Trophy leh Rs. 4,000/- an dawng a ni.

Mipa inelna ah Chhiahtlang VC chuan Darnam VC chu 3-1 (25-20) (25-15) (14-25) (25-23) a hnehin an Champion bawk a, lawmman ah Champion Team in Trophy leh Rs. 10,000/- dawngin pahnihna in Trophy leh Rs. 5000/- an dawng bawk a, Darnam VC te hian Mipa leh Hmeichhe inelna ah Final lut ve ve mah se a vanduai zawkah an tang ta ve ve a ni. He Volleyball Tournament a lawmman te hi nimin-a India Republic Day lawmna Serchhip Sports Complex-a neih ah Serchhip Bawrhsap Paul L. Khuma chuan a sem a ni.

He Tournament kharna hi Inrinni khan Serchhip Chhim Veng Volleyball Court-ah SDVA Vice President H. Rohmingliana kaih-hruaiin neih a ni a, he hunah hian SDVA President K. Tlangthanmawia chuan Volleyball chu infiamna thianghlim tak a ni tih sawiin, hei hi players te leh anmahni tantute pawhin an hriat reng a pawimawh thu a sawi a, a chak zawk te pawhin chak dan thiamin a chak lo zawk te pawhin chak loh dan thiama theihtawp chhuah duhna rilru put zawk a pawimawh thu a sawi a ni.

Tarlan tawh angin tun tuma Republic Day Volleyball Tournament-ah hian Mipa-ah team 9 leh Hmeichhia-ah Team 3 an tel a ni.