Ramchhung hmundangte rualin Serchhip-ah National Voters’ Day 2025 hman a ni

National Voters' Day vawi 15-na chu Inrinni, January 25, 2025 khan ramchhung hmun hrang hrangah hman niin Serchhip-ah pawh District Election Officer leh Bawrhsap Paul L. Khuma hovin hman a ni.
Serchhip DC Pisapui Hall-a National Voters' Day puala hun hman ah hian Bawrhsap chuan Election Commission of India din tan ni champhaphak denchhenin kum 2011 atangin National Voters’ Day chu hman thin a nih thu sawiin, “He Ni-in kan thinlunga tuh a tum ber chu democracy ropuizia, thatzia leh hlutzia min zirtir a; vote nei zawng zawng ten inthlan apianga vote thlak duhna thinlung kan put hi a ni,” a ti a. Ram hruaitu tha thlang tura vote hlu tak kan neih hi ngaihtuahna fing tak hmang chungin kan khua, kan District, kan ram hmangaihtute kan thlan a pawimawh thu a sawi a. Ram hruaitu tha lo chuan keimahni chuah ni lovin, kan fate leh kan tute thleng pawhin a nghawng thei a ni tih hria a kan vote hlu tak hi ram hruaitu tha thlan nana hmang theuh tur leh inthlan apianga vote thlak zel turin kalkhawmte a fuih a ni.

National Voters' Day puala hun hman hi Election Officer F. Lalnisai chuan kaihruaiin Addl. DC Lalrinzuala’n kalkhawm te lawmna thu a sawi a. Serchhip DC Office-a SDC Dr. Marilyn Lalruatkimi kaihhruaina hnuaiah kalkhawmten 'Voter Thutiam' an chhamrual Bawrhsap hian kum tling thar, Electoral Roll a thun thar te hnenah EPIC a sem nghal a ni. Kumin-a National Voters' Day-ah hian thupui atan ‘Nothing like voting, I vote for sure’ tih chu hman niin he ni pual hian SVEEP kaltlangin zirlaite tan Voters Awareness cum Quiz Competition buatsaih a lo nih tawh bakah National Voters Day chungchang te, thalaite tel ve a tulzia inzirtirna te leh voters te hlutna leh mawhphurhna inzirtirna neih a ni a. Serchhip District chhunga SDO Civil thuthmun pahnih - Thenzawl leh North Vanlaiphai-ah pawh he ni pual hian hun hman a ni bawk.

Mizoram State huapa National Voters’ Day 2025 lawmna pui ber Assembly Conference Hall-a neih chu Governor Gen. (Dr) Vijay Kumar Singh chuan hmanpuiin Election Commission of India chu India rama democracy tundin leh chhawmnun zel kawnga hmalatu pawimawh tak, a innghahna lungpui leh tha tichaktu a nih thu a sawi a. Mizoram-a Lok Sabha Inthlanpui 2024 hlawhtling tak buaipuitu CEO, DEO leh Official zawng zawngte chhuanawm a tih rualin, inthlan buaipuitu zinga Police 5 te'n nunna hlu tak an chan erawh pawi a tih takzet thu leh an inpekna chu ropui a tih thu sawiin, State Sawrkarin ralna sum cheng nuai 15 theuh an chhungte hnena a hlan thu a sawi a. Mizoram mipui vote nei thei tawh phawt te chu Electral Roll-a inziaklut vek tur leh vote thlak ngai pawimawh tura sawmin, vote thlak hmanga Sawrkar inrelbawlnaa tel tum turin a chah nghal bawk.