Lok Sabha MP in Tuirial-a NEEPCO hotute a kawm

Mizoram in kawlphetha a lakna NEEPCO Tuirial chu Zirtawpni zan khan Lok Sabha MP Richard Vanlalhmangaiha chuan tlawhin NEEPCO hotute nen Mizoram sawrkar nen an thawhho dan leh Power man tlem zawka lakluh a nih theih dan turte an sawiho.

Lok Sabha MP hian NEEPCO in Tuirial HEP atanga Mizoram-a kawlphetha an pek dan te enin ruahtui tam tawk thin loh avanga an duh ang Power an siamchhuah theih loh thu NEEPCO hotute chuan an hrilh a, nikum lam erawh ruahtui a tam avangin a vawikhat nan Spill Way pawh an hawn a ngaih thu an sawi bawk. NEEPCO hotute hian kum dangah chuan Mizoram Sawrkar chu Power man an pek theih thin loh avanga buaina an tawh thin thute pawh sawiin, tunah erawh NEEPCO enkawl State dang zawng aia ba nei tlem ber an nih thu leh Mizoram Sawrkar chungah pawh an lawmthu Lok Sabha MP hi an lo hrilh a ni.

Lok Sabha MP hian NEEPCo hotute chu CSR Fund an neih te Mizoram chhungah a tam thei ang ber Mizo mipuite tana hmang turin a ngen a, NEEPCO hotute pawhin harsatna an neih te lo thlenin, Central lama an hotute hnena thlen turin an ngen bawk a ni. NEEPCO hian tun dinhmunah an awmna khaw chhehvel atangin mi 300 vel hna an siam sak mek a, an CSR Fund hmang hian an chhehvel khua a School leh damdawi In te sain Ambulance, Computer Set leh thil dang engemawzat an semchhuak tawh bawk a ni.