Aizawl-ah Larsap hovin Republic Day hman a ni

Republic Day vawi 76-na chu Aizawl Sipai Lammual-ah nimin khan hman niin Larsap Gen. Vijay Kumar Singh chuan Hman puanzar pawtpharhin Parade Contigent-te zahna chibai buk a chhang let a ni.

   Larsap chuan Republic Day pualin Mizo mipuite chibai a buk a. He ni ah hian zalenna suala nun hlantute hriatreng an nih thu sawiin, sawrkar hmalakna hrang hrangte a sawi a, Viksit Bharat tihlawhtling turin State sawrkar chuan tan a lak thu leh flagship program Bana Kaih hmangin nasa takin hmalakna a kalpui mek tih a sawi bawk. Larsap chuan Mizoram ralmuan thu sawiin, Ramri-a dan lova bungraw lakluh man tura dan lekkawhtute hnathawh hrang hrangte a sawi bakah an hmalakna ropui a tih thu leh ruihhlo do a, tanrual a tul thu a sawi a. State chhunga inkalpawhna kawng tha neih tul a tih thu sawiin, Sawrkar School sak mek a nih dan leh Education Department in a nghet leh Casual a zirtirtu an lak dante a sawi bawk.

Governor chuan Handholding to Progress Partners chungchang sawiin, sawrkarin a thawhpui Bank leh Financial Institution-te hnen atangin thawhpui tur (progress partner) thlanchhuahte hnenah loan pek an ni anga. National Credit Guarantee Scheme dinglai angin State Sawrkar chu Guarantor a ni ang tih a sawi a. 'Bana kaih' ruahmanna hnuaia thuang pakhat - Chief Minister's Special Category Scheme hnuaiah sum hlawm a puih a cheng nuai khat thleng pek theih a nih bawk dawn thu a sawi a. He tanpuina hi loan la thei dinhmun a awm silo, sum tlem chhunbelh hlek a hlawkthlak tak chang thei tur eizawnna nei si te tan a ruahman a nih thu a sawi a. Bana-kaih ruahmanna hnuaiah hian thlai chi li - Sawhthing, Hmunphiah, Aieng leh Mizo Hmarcha tan Minimum Support Price (MSP) a siam a nih thu a sawi bawk.