Sawrkar thawhpui thei tur Local Council/ Village Council kan mamawh hle a ni - Chief Minister

Chief Minister leh ZPM Leader Lalduhoma chuan Local Council leh Village Council te chu Sawrkar kut leh ke pawimawh tak an ni tih sawiin, Sawrkar lai thawhpui thei tur Local Council/Village Council Sawrkarin a mamawh thu a sawi.

ZPM Thenzawl Block huamchhunga VC Candidate tur puanna hun nimin-a Thenzawl Vantawng Group YMA Hall-a neih a hmanpuina ah Chief Minister Lalduhoma chuan Local Council leh Village Council te chu Sawrkar kut leh ke pawimawh tak an ni tih sawiin, “LC/VC tha nei veng leh khua chuan hmasawnna tam tak an khawtlang tan an chawlut thin a, chutih laiin Opposition LC/VC te zingah sawrkar thawhpui hlei theilo an awm hian Sawrkar hma-laknain mipui a thleng zo lo fo thin a ni,” a ti a. ZPM Party chuan Pathian leh mipuite duhsakna changin kum khat zet Sawrkarna an chelh ve ta tih sawiin, “Hmasawnna hna han thawh tak tak dawn chuan Sawrkar lai thawhpui thei LC/VC an pawimawh zia a takin kan tawng chho mek a, kan ram rorelnaa Pathian ram tundina tur leh hmasawnna mipui thleng phak kan neih theih nan Sawrkar thawhpui thei tur LC/VC kan mamawh hle a ni,” a ti.

Local Council leh VC inthlanah hian Ruling Party tan Candidate thlan a har thin hle tih pawh Chief Minister chuan sawiin, “Mi tha tam tak leh Candidate awm tak tak an lo awm tawh vang leh rorellai party thawhpui thei tur mi tha engemaw zat an lo awm ve tawh vang a ni. Chutiang dinhmun chu ZPM Party pawhin kan tawng mek a, kan hotuten Candidate tur atana an ruat apiang te thahnem ngai taka thawhpui turin Zoram dung leh vanga lungrualpuite kan ngen a ni,” a ti bawk.

ZPM Thenzawl Block huamchhungah hian VC Area pasarih awmin Thenzawl bakah Buangpui leh Neihloh-ah te ZPM Party hian Candidate tur an ruat kim vek a, Candidate puanna hun hi ZPM Thenzawl Block President B. Lalhmangaiha chuan kaihruaiin an Party zawm thar mi 60 an lawmlut tih an sawi bawk.