Cod Nerc leh Impulse NGO Network in thlirlet

Tlawmngai pawl pakhat, Cod Nerc, Mizoram leh Impulse NGO Network, Shillong te chuan nimin khan Consumer Affairs Minister B. Lalchhanzova chu a Pisa-ah hmuin Mizorama raltlan te chawmdawlna hnathawh an thlirlet.

He thutkhawm ah hian Consumer Affairs Minister B.Lalchhanzova chuan Mizoram-ah Sawrkar leh NGO te thawhhona nasa zawk neih a la tul thu sawiin, mipuite thleng phak tak tak tura hmalakna ah NGO te chuan sawrkar tha nasa takin an ti chak thei tih a sawi a. Sawrkar in NGO te a thawhpui thiama NGO lam pawhin Sawrkar puih duhna rilru pu chunga department te nen thawhho theihna kawng te dap thiam turin a chah bawk a ni. Minister chuan raltlan te leh anmahni lo chhawmdawltu khua te tanpuina tur project chu a hova bul tan an nih dan te leh a hlawhtlinna leh a nghawng neih te thlirletna hun an hmang thei chu lawmawm a tih thu a sawi bawk.

He hunah hian C. Lalmuanthanga, State Team Lead Impulse NGO Network leh Cod Nerc Chairman chuan an hnathawh dan tlangpui tarlangin, Raltlan chhungkua mi 500 hnenah thla 6 chhung ration pek an nih thu te, kum 2023 July thla ah Champhai District tan an mamawh hmanraw hrang hrang CMO Office, Champhai an pek thu te a tarlang a. Hei bakah hian raltlan lo dawngsawngtu khawtual mi te tan thlai thar rang chi an pek thu te a tarlang a. Impulse NGO Network-a Chairman Tashi Rapten Barfungpa pawhin Agriculture Department, Horticulture Department leh ATMA te puihna an dawn avanga lawmthu sawiin, Mizorama sawrkar Department ten NGO te nena an thawhhona chu entawntlak a tih thu a sawi bawk.