Kum 2018 hnuah kangmei vangin mi 19 thi tawh

Mizoram Fire and Emergency Services chhinchhiah danin kum 2018 atanga 2024 chhungin Mizoram-ah kangmei chhuak avangin mi 19 in nunna an chan.

Mizoram Fire and Emergency Services hotuten Akashvani News an hrilh danin, kum 2018 atanga 2024 chhung khan Mizoram-ah kangmei vanga nunna chan mi 19 awmin kum 2022 khan mi 15 laiin nunna an chan a, kum 2019 khan kangmei chhuak avangin mi 3 in nunna an chan bakah nikum, kum 2024 khan mi pakhat in nunna a chan thu an sawi bawk.

Akashvani Correspondent zawhna chhangin F&ES hotute chuan Aizawl khawpui chhung bikah Fire Station panga a awm thu leh Mizoram pumah Fire Station 14-a awm thu an sawi a, kum 2018 atanga 2024 chhung hian kangmei avangin mi 42 in hliam tuarin leh In kang a vai a belhkhawmin 278 a awm thu an sawi a, kum sarih chhunga kangmeiin thil a tihchhat hlutna hi a vai a belhkhawm in Rs 7,83,258,602/- hu nia chhut a ni bawk.

Mizoram Fire and Emergency Services hotute chuan mitin ten kangmei chhuak kan ven theihna tur atan meinung reng reng ngaihthah lo tur leh meizial bung a nung chunga paih lo tur te, mei chhemna hnanrua naupang khawih phak a dah lo tur te, kangmei a lo chhuak a nih pawhin chi-ai mai lova rang taka In chhunga mite leh thenawm hnaite hrilh vat a, Fire Station hnai ber-ah fiah leh rang taka kangmei chhuahna hmun hriattir vat turte leh Aizawl leh District hrang hranga Fire Hydrant venhim chu mitin te mawhphurhna leh Hydrant dal a lirthei dah lo tura mitinte an ngen thu an sawi bawk.