Aizawl-ah Raj Bhavan-ah State leh UT Foundation Day lawmna Governor in a buatsaih

Nimin khan 'Ek Bharat Shreshtha Bharat' hmalakna hnuaiah Uttar Pradesh State leh Dadra and Nagar Haveli and Daman and Diu Union Territory-te Foundation Day lawmna hun chu Aizawl-a Raj Bhavan-ah neih a ni.

Uttar Pradesh Foundation Day hi January ni 24 niin Dadra and Nagar Haveli and Daman and Diu Foundation Day hi January ni 26 a ni a, remchan zawkna avangin nimin khan hemi pual hian Mizoram Larsap Gen (Dr) Vijay Kumar Singh chuan he hun hi buatsaihin Uttar Pradesh leh Dadra and Nagar Haveli and Daman and Diu-te Foundation Day pualin chibai bukin duhsakna a hlan a. India rama State leh Union Territory hrang hrangte'n chanchin leh hnam ziarang ngaihnawm tak tak an neih thu sawiin, Foundation Day buatsaih chu hnam zingrang, zai, lam, rimawi leh chanchin pholanna leh inhriatpawhtawnna hun remchang tak a ni, a ti a. Sawrkar laipui hmalakna Ek Bharat Shreshtha Bharat chuan hnam inpumkhatna leh hnam ziarangte inzahtawnna chawinun a tum ber thu sawiin, “He programme hi India ram culture hausakzia lawmna leh inpawh lehzualna tura ruahman a ni,” a ti bawk.

Larsap chuan thalaite chu India ram hmasawnna chak taka kalpui mekah tha thawhtu nih tum tur leh ram ropui taka India ram siamtu, hnam ziarang leh nunphungte zira, hriatchian tum turin a fuih a. Prime Minister kaihhruaiin India ram chu kum 2047-ah ram changkang leh intodelh, 'Vikshit Bharat' a hlankai tum a nih thu pawh sawiin, hma hun eng tak nei thalaite chu hemi kawngah hian theihtawp chhuah turin a chah a. Kalkhawmte chu India rama cheng mi hrang hrangte min phuarkhawm tlattu hnam ziarang leh danglamnate chu ngaihlua vawnghim tlat tur leh, ram hmasawn dinhmuna India ram hlankai tum turin a sawm bawk a ni.

Uttar Pradesh hi tunhma British-in India ram a awp hunlai khan United Provinces tih niin Agra leh Oudh-te a huam a. January ni 24, 1950 khan Uttar Pradesh tia thlak niin India rama State mipui tamna ber leh a len zawnga chhiara 4-na a ni. Union Territory pahnih Dadra and Nagar Haveli leh Daman and Diu-te hi Portuguese Colony ni thinin, January ni 26, 2020 khan Union Territory pakhata chhunfin an ni bawk a. Nimin a an dincham lawmna hunah hian an chanchin te ngaihthlak niin an hnam zai leh lam te entir a ni bawk.