Serchhip-ah Free Movement Regime (FMR) hlih leh Border fencing tum duhloh lantirna neih a ni

Zo Reunification Organisation (ZORO) buatsaihin nimin khan Serchhip-ah Free Movement Regime (FMR) hlih leh Border fencing tum duhloh lantirna neih a ni a, hemi rual hian Aizawl-ah hmundang ah pawh hun hman niin FMR hlip a, kengkawh tura India sawrkar thupek leh Mizoram sawrkar thupek te chu hal a ni.

ZORO huaihawta Free Movement Regime (FMR) hlih leh Border fencing tum duhloh lantirna hun hi Serchhip-ah chuan nimin chhun dar 12:00 khan Serchhip Bazar Tual-ah hman niin Serchhip-ah hian a hrana ZORO a din loh avangin mi thahnem ngai te kalkhawmin hun an hmang a, he hun hi New Serchhip Vengthar-a cheng Chungnunglura chuan kaihruaiin he hun hman a nih chhan te a sawi a. Hemi hnu hian ZORO-a General Secretary KH. Vanlalruati chuan UN General Assembly-a pass, India ngei pawh a pawmtu zinga a telna, United Nations Declaration on the Rights of Indegenous Peoples (UNDRIP) Article 36-in a sawi, hnam khat ni si khawvel ramri in a thendarh te chu zalen taka inkalpawh te, politics lama thawhho te, insumdawn tawn te, zalen taka inpawh ho a lo phal tawh chu ram roreltute chuan tualchhuak hnamte nen inberawnin an dikna chanvo te tipuitling turin hma a la ang tih a nih laiin FMR thiah a ni leh ramri hung tum a ni hian a bawhchhia tih a sawi a. India in a pawm tawh dodal zawnga ke a pen chu an hrethiam lo tih sawiin, Central atanga order lo kal leh Mizoram sawrkar lehzelin Order a pechhuak chu ZORO chuan a duh loh lantir nan he hun hi an buatsaih tih a sawi a, sawrkar thupek chu an hal chhunzawm nghal bawk a ni.

Free Movement Regime (FMR) hlih leh Border fencing tum duhloh lantirna hun Aizawl-a hman chu ZORO Vice President Rohmingthanga Kawlni chuan kaihruaiin ZORO General Secretary L. Ramdinliana Renthlei chuan Free Movement Regime (FMR) thiah leh Border fencing a lo rik tirh khan Zofate chuan an helh hle tih sawiin, ZORO pawhin an theihtawp-a an dodal thu leh NGO hrang hrang leh Political party pawhin an dodal bakah Mizoram State Legislative Assembly Session-ah pawh duhlohna resolution lungrual taka pass a ni tih a sawi a. “Heti khawpa Zofaten kan duh lo chunga India sawrkarin a ti lui a nih chuan kan ramah eng harsatna pawh thleng se mawh kan phur dawn lo a ni. FMR hlih leh border fencing hi ZORO chuan a dodal zel dawn a, na zawk a hmala turin ruahmanna siam a ni dawn a, ZORO hmalakna thlawp zel turin mipui zawng zawng kan sawm a ni,” a ti bawk.

Free Movement Regime (FMR) hlih leh Border fencing tum duhloh lantirna hun hi nimin vek khan Champhai, Lunglei, Kolasib, Mim-bung, Vaphai leh Tengnopal Manipur-ah te hman a ni bawk.