Serchhip District-a VC Inthlanna atan ngawrh taka inbuatsaihin ZPM in VC seat 7 an la tawh

Serchhip District chhunga Village Council 56-a inthlanna thla thar February 12-a neih turah chuhtu awm lova tling-a puan mi 7 awmin an vai hian ZPM Candidate te vek an ni a, ZPM hian VC pakhat la tawhin Vote thlakna tur VC hrang hrangah inbuatsaihna ngawrh taka kalpui mek a ni bawk.

Serchhip District Bawrhsap leh District Election Office Paul L. Khuma chuan nimin khan Serchhip DC Meeting Hall-ah thuthar thehdarhtute kawmin thla thar February 12-a Village Council Inthlanpui neih tura inbuatsaihna an kalpui dan a hrilhfiah a. He Inthlanna hi Serchhip District-a VC 56-ah neih tur niin General Seat 188 leh Hmeichhia te tana Seat hauh 66, a vaiin seat 254 a awm a, District Election Officer in a tarlan danin General seat chuh tur hian mi 524 leh Reserve Seat chuh tur hian mi 174, an vaiin mi 698 ten hming an pelut a ni. Heng hming pekluh te hi Returning Officer te kaihhruaina hnuaia endik a nih hnuah pawm vek a ni a, Inhnuhdawh hun chhungin General Seat chuh tur mi 9 leh Reserve Seat chuh tur mi 2, an vaiin mi 11 te inhnukdawkin heng te hi INC atangin mi 4, MNF atangin mi pakhat leh Independent-a ding mi 6 te an ni a. Inhnuhdawh hun a tawp hnu hian chuhtu awm lova tling mi 7 awmin Reserve Seat atangin Lalhriatkimi, Hmunzawl; Lalthazuali, Neihloh leh Nuntharnghakzeli, Chhuanthar Tlangnuam bakah General Seat atangin Dawngzela, Huntharnundila, B.Lalrinnunga leh H. Lalmalsawma, Chhuanthar Tlangnuam vek te niin an vai hian ZPM Candidate te vek an ni a, Chhuanthar Tlangnuam-ah hian ZPM hian VC an la nghal a ni.

Heti hian February 12-a Vote thlakna tur VC 55-ah chuan Candidate mi 680 an awm dawn ta a, heng te hi ZPM atangin General Seat-ah 184 leh Reserve Seat-ah 63, an vaiin 247; MNF atangin General Seat-ah 163 leh Reserve Seat-ah 54, an vaiin 217; INC-ah General Seat-ah 140 leh Reserve Seat-ah 44, an vaiin 184 bakah Independent-a ding General Seat-ah 24 leh Reserve Seat-ah 8, an vaiin 32 te an ni.

He inthlanna atan hian Presiding Officer, Polling Officer leh Returning Officer te ruat ni tawhin January 30 leh February 6-ah training buatsaih a ni dawn a, Returning Officer tan hian January 16-ah training vawikhat buatsaih a lo ni tawh bawk a. Heng bakah hian Inthlanna felfai a awm theihna turin Sector Officer 8 ruat niin District chhunga Polling Station an tlawhchhuak mek a, hmun danga an tih ve loh Flying Squad chu Serchhip District-ah 11 siam niin Model Code of Conducts bawhchhiatna a awm leh awm loh te enfiahin complaint awm te pawh an bawhzui nghal zel dawn a ni,

District Election Officer chuan Sawrkar hnathawk Election-a duty tura ruat, Persons on Election Duty (PED) te tan vote thlak dan tur rua-hmanna siam a nih thu pawh sawiin, hetianga Vote thlak turte chuan Form 21 hmangin DEO hnenah dilna thehluh tur a nih thu leh District pawna Vote neite tan February ni 1 leh District chhunga vote neite tan February ni 8 thleng dilna thehluh tur a nih thu a sawi a. District pawna Vote nei te hian February ni 6-ah leh District chhunga vote nei te chuan February ni 6 atanga February ni 8 Serchhip DC Office-ah Vote a thlak theih dawn thu a sawi bawk a ni.

Bawrhsap in thuthar thehdarhtute a kawmna ah hian Addl. DP Saidingliana Sailo chuan inthlanna muanawm a awm theihna tura venhimna an ruahman an te sawiin, Sector Police Officer, Flying Squad leh QRT te siam a nih tawh bakah Strong Room vengtu tur thlenga an in ruahman tawh thu a sawi a, Police Hqrs. lamah Police an dil belh thu pawh a sawi bawk.

Nimin-a District Election Officer in thuthar thehdarhtute a kawmna ah hian Election Officer F. Lalnisai leh Official dang te an tel bawk a ni.