Liapha khua ah Oil Palm herna khawl bun dawn

Lawngtlai District-a Liapha khua ah Patanjali Foods Limited te chuan Oil Palm herna khawl an bun dawn.

Oil Palm Operations North East-a Chief General Manager & Head Ashok Kumar Singh leh Patanjali Foods Limited-a Plantation and Nursery-a Deputy General Manager Tapas Kumar Tripathy te chuan nimin khan Chief Minister Lalduhoma chu a Pisa-ah kawmin Chief Minister hian Mizoram chhim lama Oil Palm chingtute harsatna sutkian dan tur leh a tul anga chin belhna tur ruahmanna te a sawipui a. Heng bakah hian Sawhthing, Aieng leh Hmarcha an lei dan tur pawh a sawipui bawk a ni.

Patanjali Food Limited hian Lawngtlai District-a Liapha khua ah Oil Palm Mill an bun dawn a, kum khat chhung vela an inbun fel theih an inbeisei a. Mizoram chhim lam District Serchhip, Lunglei, Lawngtlai leh Siaha District-a Oil Palm chingtute tharchhuah chu sawrkar rate dinglai angin an leisak dawn a ni. An mamawh khawp Oil Palm thar chhuahsa a la awm loh avangin Nursery te siamin a chin belhna lam pawh an umzui dawn bawk a ni.