Civil Hospital Aizawl-ah inentir 5,03,956 an awm

Mizoram-a damdawi In lian ber leh mipui pan tam ber Civil Hospital, Aizawl (CHA)-ah nikum (2024) chhung khan damlo inentir mi 5,03,956 an awm a, an zinga 4,53,960 chu OPD a inentir niin a dang 49,996 hi Casualty (Emergency) a inentir an ni.

Civil Hospital, Aizawl-a damlo inentir zingah hian Medicine OPD pantu tam berin mi 83,895-in an pan a, hei hi CHA-a damlo inentir zawng zawng atanga chhutin 17% an tling a ni. OPD-a damlo inentir tam zual dangte chu hmeichhe lam natna (gynea & obst.), inzai (surgery) leh mit (eye) te an ni a. Damlo enkawlna (Ward) zingah Emergency OPD chu lun berin chawhrualin khum 101.90% luah khat reng ang an ni a, Female Medical Ward 97.65% leh ENT 96.04% ten an dawt a ni.

Nikum chhung vek hian Civil Hospital, Aizawl-ah hian nau piang 3,441 an awm a, heng zinga 1,747 hi mipa an ni a, hmeichhia 1,694 an awm bawk a. Zai pui (major operation) tawk mi 7,260 leh zai tenau tawk mi 10,852 awmin zai tawk hi an vaiin mi 18,112 an awm a. Mitthi 702 an awm bawk. Nikum chhung veka state pawna damlo inenkawl tura thawn chhuah (refer) zat chu 2,688 an ni.