MNF in kawng siamtha thuai turin sawrkar an phut

MNF party chuan nimin khan thuchhuah siamin Mizoram Truck Owners' Association (MTOA) leh Mizoram Truck Drivers' Association (MTDA) ten Vawiin January 23, 2025 atanga Mizoram ei leh bar chawkluhna kawngpui ber Vairengte to Sairang kawng chhiat lutuk avanga an tlan ngam tawh loh tur thuchhuah an siam chu lungchhiatthlak an tih thu leh sawrkar chu a rang thei ang bera kawng chhiate siamtha thuai tura an phut thu an sawi a. “PWD Minister berin kawng siamna tura pawisa awm thu a sawi reng lai te, kha leh chen ruahtui tlak loh leh khaw that hun pawha helai kawng hi siamthat tum si lo; January ni 20, 2025 atang chauha Vairengte leh Sairang inkar kawng siamtha tura Mizoram PWD-in hma a la tan ve chauh hi MNF chuan sawrkar inthlahdah lutuk avanga che tlai ah a ngai a. PWD Minister chu chak taka hma la a, kawng chhe laite siamtha nghal zung zung turin kan phut,” tiin kawng siamna tura tuialhthei atanga chhiah lak pawh a hmanna tur dik taka hmang turin sawrkar chu an ngen tih an sawi bawk.