Kumin ah Aieng quintal sing riat chuang thar beisei

Mizoram chhungah kum 2024 chhungin Aieng quintal 7817 leh kg 155 chin a ni a, heng atang hian quintal 81,609 leh kg 9 tharchhuah beisei a ni.

Agriculture Department chhinchhiah danin Mizoram chhunga Aieng chinna atan hian ram acre 4282 leh bigha 6 hman a ni a, Mizoram pum anga chhutin chhungkaw 3415 ten Aieng hi an ching a ni. Kolasib District-a chhungkaw 449 te chuan Aieng quintal 637.64 chingin quintal 4749.8 tharchhuah beisei a ni a, Saitual District a chhungkaw 299 te pawhin quintal 486.81 an chin atangin quintal 2801.2 tharchhuah beisei a ni bawk. Mizoram-a District paruk Champhai, Siaha, Serchhip, Lawngtlai, Mamit leh Khaw-zawl-ah te chhungkaw 1158 in Aieng quintal 2,115.23 an chinah quintal 42,970.88 thar beisei a ni bawk.

Mizoram chhungah Lunglei District Aieng ching hnem ber niin chhungkaw 892 ten Aieng quintal 3,565.18 an chinah quintal 23,368.51 thar chhuah beisei a ni a. aieng ching tlem ber chu Hnanthial District niin chhungkaw 70 ten quintal 103.85 an chinah quintal 521 tharchhuah beisei a ni bawk.