Ram inpumkhatna turin mawhphurhna kan neih nasat phah a ni - Governor

Mizoram Governor Gen (Dr) Vijay Kumar Singh chuan India ram hmarchhak hmun pawimawh tak, thenawm rambuaiin a chim mekte hualvelah kan awm tih sawiin, “Ram inpumkhatna turin mawhphurhna kan neih nasat phah a ni,” a ti.

Ek Bharat Shreshtha Bharat kaltlanga Manipur, Meghalaya leh Tripura State-te Foundation Day tun thla ni 21 denchhena Raj Bhavan Durbar Hall-a nimin-a hun a buatsaih ah Governor Gen. VK. Singh chuan Manipur, Meghalaya leh Tripura State-te Foundation Day puala chibai bukin duhsakna a hlan a. Ek Bharat Shreshtha Bharat kaltlanga State dangte dinchampha inlawmsak thin chuan India ram Culture hausakzia leh inpumkhatzia a pholang tih sawiin, Prime Minister-in India ram chu kum 2047 ah ram changkang leh intodelh, 'Vikshit Bharat' a hlankai a tum kawngah hmarchhak State-te chuan dinhmun pawimawh tak an luah thu a sawi a, “India ram hmarchhak hmun pawimawh tak, thenawm rambuai in a chim mekte hualvelah kan awm a, hemi karah hian ram inpumkhatna turin mawhphurhna kan neih nasat phah a ni,” a ti bawk.

Larsap chuan Foundation Day lawm tura kalkhawmte chu tun ai zawnga inpawh lehzual nan State dangte hnam ziarang leh nunphungte phur taka hriatchian tum tur leh zah thiam tum turin a chah a. Hmarchhak State-te leh India ram hmun dangte tunhma zawng aia an inpawh ta chu lawmawm a tih thu sawiin, thalaite chu an hawiher tizau deuh deuh turin a fuih a. State hrang hrang aiawh thusawitu leh hnamlam mawi tak tak entirtute fakawm a tih thu sawiin, Vikshit Bharat ni thei tura theihtawp chhuahpuiah a sawm nghal bawk a ni.

Ek Bharat Shreshtha Bharat programme hian India rama State leh UT hrang hranga cheng hnam hrang hrang, hnam ziarang leh nunphung inang lo tak takte inkara inpawhna tha zawk siam leh an inkara inhriatthiam tawnna nasa zawk siam a tum a. Ek Bharat Shreshtha Bharat programme kaltlang hian India rama State leh UT hrang hrangte Foundation Day lawmna chu Raj Bhavan, Mizoram-ah Governor kaihhruaiin  June, 2023 atang khan buatsaih tan a ni.

Manipur leh Tripura-te hi kum 1949 khan India-ah betin kum 1956-ah Union Territory pek an ni a. Meghalaya hi tunhmain Assam State hnuaiah awmin kum 1969 khan Autonomous State an ni a. Heng State pahthumte hi January ni 21, 1972 khan North Eastern Region (Re-organisation) Act, 1971 hmangin State puitlina hlankai an ni.

Nimin-a he hun hman hi Zonun Thara, ADC (P) to Governor chuan kaihruaiin State pathum Governor ten Video Message an siam chu thlirho a ni a, State pathum aiawh ten thu an sawi bakah zirlai ten Hnam lam chi hrang hrang an entir bawk a ni.