MSPMC ten Mizoram chhim lamah hnathawh an enfiah

Mizoram State Project Monitoring Commitee (MSPMC) chuan nimin leh niminpiah khan Saiha leh Lawngtlai District-a sawrkar hmalakna thenkhat te tlawhin a hmunah an enfiah.

MSPMC hian nimin khan an Vice Chairman R. Lalrinawma IRS (Rtd) hovin Siaha DC Office Building leh Bungalow, Polytechnic Building bakah Nursing School building bakah EMRS School Noaotla, Siaha-Lobo-Tluangram (Hakha/Myanmar) leh PMGSY hnuaia Noaotla to Chakhei road siam hna thawh mek te chu a hmunah kalin an enfiah a. Siaha DC Office Building hi NEDP atanga MPWD sak a ni a, DPR/estimated cost/ approved cost chu cheng nuai 610.11 niin October 31, 2018 khan sak tan a ni a, kum 2 chhunga zo hman tura ruahman niin 90% zawhfel tawh a ni. DC Bungalow (Type VI) hi NEDP atanga MPWD sak niin cheng nuai 110.90 senga thawh tura ruahman a ni a, November ni 26, 2018 khan sak tan niin 98.3% zawh tawh a ni.

Thosai-a Polytechnic Administrative cum Academic Block hi CSS atanga MPWD sak niin April ni 11, 2016 khan sak tan a ni a. Hostel Building hi CSS atanga MPWD sak niin April ni 11, 2016 khan sak tan a ni bawk a. Polytechnic Staff Quarter pawh CSS atanga MPWD te sak niin cheng nuai 800 senga sak tur a ni a, April ni 11, 2016 khan hna hi tan a lo n tawh ibawk a. GNM School Building hi CSS atanga H&FW Department sak niin, DPR /Estimated/ Approved amount chu cheng nuai 377.10 niin January 2013 khan sak tan a ni bawk. MSPMC Team-te hian heng building satu Contractor-te hi sak zawh a nih loh chhan leh harsatna awmte zawt chiangin tangkai zawka hman theih dan tur an zirchiang a. Hnathawh tawh chin that leh that loh bakah an hnathawh chungchang an sawipui nghal a ni.

Mizoram State Project Monitoring Commitee (MSPMC) hian niminpiah khan Polytechnic Building, Thingkah leh Lawngtlai District Sports Complex, Mampui te chu tlawhin hnathawh mek te an lo enfiah tawh bawk a. Polytechnic Building - Academic Block, Hostel leh Staff quarters te hi sak zawh anih atanga hman a nih loh avangin a hlui chhe tawh hle a, luahlum loha dah reng lo a tangkai zawka hman theih dan tur an zirchiang a ni. Polytechnic Building, Thingkah hi PWD kaltlangin cheng vbc. 8 sênga sak niin, kum 2013=ah sak tan a ni a, kum 2014 khan sak zawh a ni.

Lawngtlai District Sports Complex, Mampui hi hnathawh tawh chin that leh that loh bakah huntiam chhunga zawhfel a ni thei dawn em tih an endik bawk a. Lawngtlai District Sports Complex sak hna hi Decor India, Guwahati, ten thawk mêkin cheng nuai 5019. 43 seng a sak tur a ni a. He hna hi July 25, 2022-ah tan niin July 24, 2025-a zawhfel tura ruahman a ni. MSPMC Team-te hian hnathawk mêktu Decor India hotute kawmin, an hnathawh chungchang an sawipui nghal a ni.