Larsap in YMA, MHIP leh MZP hruaitute kawmin an hmalakna hrang hrangte a sawipui

Mizoram Larsap Gen. ( Dr) Vijay Kumar Singh chuan nimin khan Mizoram-a tlawmngai pawl, YMA, MHIP leh MZP hruaitute chu Raj Bhavan-ah kawmin Mizoram hmasawn nana pawimawh leh tul hrang hrangte a sawipui a, tlawmngai pawl te thu thlen hrang hrang chu a theih anga a bawhzui tur thu a sawi a ni.

Governor hian nimin chawhma lam khan Central YMA hruaitute chu Raj Bhavan-ah kawmin Larsap chuan Mizo khawtlang nunah YMA pawimawhna leh a hnathawh te a lo hriat tawh thu sawiin, Mizoram leh Mizo khawtlang nun siamthat kawnga theihtawp chhuah zel turin Central YMA hruaitute chu a sawm a, Central YMA a chet chuan Mizo Society ah thil tam tak a tih theih thu leh mipui tanhona a pawimawh thu a sawi bawk. Central YMA hruaitute hian NGO Darpan Portal chungchanga harsatna an neih te siamrem a nih theihna tura hma lak sak turin Larsap hi an ngen a. India Constitution 8th Scheduled-a Mizo tawng dah ve a nih theihna tura hmalak pui tur leh hemi chungchanga Prime Minister hnena lehkha an siam chu thehluh sak turin an ngen nghal bawk.

He hunah hian Mizoram leh State dang inkalpawhna kawngpui tha hlei thei lo chungchang te sawiho a ni a, Larsap hian Mizoram a a awm chhunga inkalpawhna kawngpui in hma a sawn theihnana tan lak a tum thu leh a hmunah tlawh a tum thu a sawi a. Ruihhlo in Mizo khawtlang nun a run nasat dan leh thalai tam tak ruihhlo bawi-a an tan dan te, ruihhlo do kawnga YMA hmalak dan leh Sawrkar nen thawhho dan te sawi lan a ni bawk.

Larsap hian chawhnu lamah Mizo Zirlai pawl (MZP) hruaitute kawm bawkin MZP hian Free Movement Regime (FMR) leh Border Fencing chungchanga MZP ngaihdan an hrilh a. Hnam khat, chi khat, unau ramri-in a thendarh te insuihkhâwm chu MZP hmathlir a nih mek laia, zalen taka inkalpawhna tih tawp a ni leh ramri hung tumna MZP in a duh loh thu an hrilh a. A theih ang anga hma lak pui tura Governor chu ngenin, Union Home Minister hnena hemi chungchanga MZP lehkha thawn tur an hlan nghal a. Mizo zirlaite tan Study tour buatsaih sak tur leh Railway hnuaia hnaruakah Mizo zirlai a tam thei ang ber an luh theih nan Mizoram-ah Exam Center dah a nih theih nana hmalak sak turin an ngen bawk.

Governor chuan MZP ten zirlaite hma-khua ngaia a hnena an thil thlente chu theih ang anga a bawhzui tur thu a sawi a. Kawng hrang hrangah thawhpui tura lo sawmin, Zirlaite ruihhlo laka an fihlîm theih nan theihtawp a hmala turin a lo fuih a. Hemi kawnga an hmalaknaah chuan amah pawh a inhawn hle tur thu a sawi a bawk.

Nimin vek khan Governor hian Mizo Hmeichhe Insuihkhawm Pawl (MHIP) hruaitute chu Raj Bhavan-ah kawm bawkin an hmalakna hrang hrangte a sawipui bawk a ni.