Aizawl-ah TB Awareness Rally neih a ni

National Health Mission buatsaihin ‘National TB Elimination Programme’ hmalakna hnuaiah nimin khan Aizawl-ah Helen Lowry Higher Secondary School NSS Unit te nen ‘TB Awareness Rally’ neih a ni a, National Health Mission (NHM)-a Mission Director Dr. Eric Zomawia chuan a vailiam a ni.

He Rally hi Aizawl Vaivakawn Traffic Point-ah tanin National Health Mission Office, Dinthar thleng neih a ni a, he Rally hi kum 2025-a TB umbo anih theihna tura hmalakna, 100 Days Campaign kalpui mek denchhen buatsaih niin Pledge chhiar rualna neiin TB vei lo tura pawimawhte chhiarchhuahna hun hman a ni bawk.

He Rally-ah hian National Health Mission (NHM)-a Mission Director Dr. Eric Zomawia chuan kum 2025-ah TB hi India ram atanga umbo tum anih tawh avangin hemi hmalakna pawimawh tak, ni 100 chhung TB zawnchhuah beihpui thlak chu kalpui mek a nih thu a sawi a. Mizoram-ah chuan Aizawl, Champhai, Serchhip leh Mamit District-ah te kalpui mek a nih thu leh mipui ten TB an vei nge vei lo tih hmuhchhuah sak a, enkawl vat chu he hmalakna in a tum ber anih thu a sawi a. TB hrik chu mi tam takin an pai sa angah ngaih anih thu leh tunah natna a rawn thlen mai lo anih pawn engtik hunah pawh TB natna ah a insiam thei a ni tih sawiin, TB lanchhuah dan te hriatchian a, a rang thei ang bera in test vat thin chu a pawimawh thu a sawi a. TB chu meizu mi leh Zu leh ruihhlo laka fihlim lo bakah chaw tha tlachham ten an vei awlsam bik thu a sawi a. Zirlai naupangte chu zuk leh hmuam laka fihlim a, chaw tha leh hrisel ei uar turin a fuih bawk. TB natna ah Chuap TB chauh chu inkaichhawn theih anih thu leh a veite chuan midang an kaidarh loh nan Khuh leh hahchhiau in hmui hup that a pawimawh thu a sawi bawk.

TB Awareness Rally hi Serchhip-ah chuan NSS Unit Brilliant Higher Secondary School te nen neih a lo ni tawh a. Champhai-ah NSS Unit Govt. Gandhi Memorial Higher Secondary School te nen neih a ni tawh bawk.