Village Council Inthlanpui chuh tum te tana hming pekluh hun a tawp ta

Thla thar February 12-a Village Council Inthlanpui neih tur chuh tum te tana hming pekluh theih hun chu nimin tlai khan a tawp ta a, heng hming pelut te hi Vawiin hian an Nomination paper enfiah a ni ang.
Seat 5 awmna Serchhip Darnam-ah Party pathum ZPM, MNF leh Congress ten Seat awm zawng zawng chuh vekin Independent-a General Seat chuh tura hming pelut mi pakhat a awm a, Seat 5 bawk awmna Serchhip Dinthar VC-ah ZPM leh MNF ten Seat 5 ve ve chuhin Congress in General Seat pahnih leh Reserved Seat pakhat chuhin Candidate pathum an nei dawn a, hming pelut mi 13 an awm a ni. Serchhip Vengchung VC-ah Seat 5 awmin hming pelut mi 16 an awm a, ZPM, MNF leh Congress atangin mi 5 theuhin hming pelutin Reserved Seat chuh turin mi pakhat in a hming a pelut bawk. Serchhip Field Veng VC-ah Seat 5 chuh turin ZPM leh MNF ten Candidate 5 ve ve neiin Congress atanga hming pelut mi pahnih awmin an vaiin mi 12 ten hming an pelut a. Seat 5 bawk awmna Serchhip Hmar Veng VC-ah ZPM, MNF leh Congress atangin mi panga theuh ten hming pelutin General Seat-ah Independent-a chuh tura hming pelut mi pakhat a awm bawk a, an vaiin mi 16 ten hming an pelut a ni.

Serchhip Chanmari VC-ah seat 5 awmin ZPM leh MNF te chuan Seat awm zawng zawng chuh vekin Congress Party chuan Seat 4 an chuh dawn a, General-a seat pakhat an chuh dawn lo a, an vaiin hming pelut mi 14 an awm a ni. Serchhip Chhim Veng-ah Seat 5 awmin ZPM in heng Seat 5 te hi chuh vekin Independent-a chuh tura hming pelut mi 5 bawk an awm a, heng te hi MNF leh Congress te chuan an thlawp a ni. Serchhip Kawnpui VC-ah Seat 5 awmin ZPM atangin Inthlan chuh tura hming pelut mi panga an awm a, MNF leh Congress te thawkdunin MNF in Seat 2 leh Congress in Seat 3 an chuh dawn a ni. Serchhip Kawnpui North-ah Seat 5 awmin ZPM, MNF leh Congress te chuan Candidate 5 theuh neiin an vaiin inthlan chuh tura hming pelut mi 15 an awm a, Serchhip P&E Veng-ah Seat 7 awmin ZPM, MNF leh Congress ten seat awm zawng zawng chuh vekin an vaiin inthlan chuh tura hming pelut mi 21 an awm a, New Serchhip North leh New Serchhip South VC-ah Seat 7 ve ve awm bawkin ZPM, MNF leh Congress ten an chuh theuh dawn a, Candidate mi 21 ve ve an awm dawn bawk a ni.

Chhiahtlang North VC-ah Seat 5 awmin ZPM, MNF leh Congress ten Seat awm zawng zawng an chuh vek dawn a, Chhiahtlang South VC-ah Seat 5 bawk awmin ZPM, MNF leh Congress ten Seat awm zawng zawng an chuh dawn bawkah General Seat chuh tura Independent-a hming pelut mi pakhat a awm bawk a, an vaiin mi 16 in hming an pelut a ni.