Village Council Inthlanpui neih tura Serchhip District inbuatsaihna thlirho a ni

Village Council Inthlanpui Serchhip District-a neih tur atan inbuatsaihna ngawrh taka kalpui mek a ni a, nimin khan Serchhip District Bawrhsap leh District Election Officer Paul L. Khuma leh Serchhip District bialtu Election Observer C. Lalduhzuali te hovin Village Council Inthlanpui lo awm tur atana inbuatsaihna hrang hrangte thlirho a ni.

Serchhip DC Meeting Hall-a thutkhawm neih ah hian District Election Officer Paul L. Khuma chuan Inthlanpui chu theihtawp chhuaha mi zawng zawng tanrualna nena hmachhawn a tulzia a sawi a. Nodal Officer te leh Sector Magistrate te ruahmanna chipchiar taka duang a, tha taka keng tlang turin a fuih a. Inthlanna muanawm leh felfai taka kalpui chu an tum ber a nih thu sawiin, thutkhawm -a tel te chu a ki peng pawimawh ber ber te an nih thu a sawi a, an chanpual theuh hnehsawh taka kengkawh turin a chah bawk.

Serchhip District Bialtu Observer C. Lalduhzuali chuan Serchhip District-ah Election felfai leh thianghlim takin neih a lo ni tawh thin a, tun tumah pawh tluang taka a kal a beisei thu a sawi a. Tunhnai lawkah MLA leh MP inthlanpui hlawhtling taka neih zawh a ni tawh a, a kalphung a inang tlangpui a, thil danglam deuh awm te hrechiangtu leh buaina awm theite chingfel tura inbuatsaih turin thawktute a fuih a. Mahni mawhphurhna theuh bel taka hre theuh turin a chah a ni.

He thutkhawm ah hian Nodal Officer ten an chanpual theuha ruahmanna an siam te an tarlang a. Felhlel lai leh hmaih palh awm te sawiho leh siamthat a ni a. Sector Officer te hi Magisterial Power pek vek niin an bial theuhah Sector Magistrate mawhphurhna an kengkawh nghal dawn a. Polling Station tinah Assured Minimum Facility a awm kim em tih endikin an fehchhuak bawk a ni.

Tun tuma Village Council Inthlanpui lo awm turah hian Vote nei atanga za zela 90 a tlin ngei theihna turin Serchhip District chuan tan a la a. hemi atan hian MPF te, YMA te, MJA te leh SHG te nen thawkhoin thuang hrang hranga hmalak a ni dawn a. Polling Booth tinah Mizo thuama inthuam Booth Ambassador siamin vote thlak tura mipui lokal te an tanpui ang a. Voter tam dan a zirin Category 3-a thliarin Voter turn out inelna siam a ni dawn a, vote tlak thatna ber Sector Officer, VLO leh YMA te lawmman pek an ni ang.