Dan kalha inthlan Democracy kalphung zah lohna leh pawngsualna nasa tak a tlin thu sawi

MNF Treasurer Lalruatkima chuan dan kalha a hun hmaa inthlanna buatsaih chu mipui rorelna (Democracy) kalphung zah lohna leh pawngsualna nasa tak a tlin thu a sawi.

Nimin-a Aizawl Mizo Hnam Run-a MNF in Chhung Inkhawm an neih ah MNF Treasurer Lalruatkima chuan VC leh LC-te term ding lai ZPM sawrkarin thla 6 chuang zetin a pawt tawi tih sawiin, dan kalha a hun hmaa inthlanna a buatsaih lui tur chu mipui rorelna (Democracy) kalphung zahlohna leh pawngsualna nasa tak a tlin thu a sawi a. “Cabinet Minister Pi Lalrinpuii chuan ni 10.06.2024 khan LC leh VC-te zingah an mi leh sa ni lo te chu sawrkar thawhpui tha duh lovah puhin an term pawhtawi sak a nih tur thu a lo sawi tawh a. Cabinet Minister Pu K. Sapdanga pawhin ni 19.10.2024 khan Mualvum IR Police ho hmaah Party dang VC an la tam avangin hmasawnna hnathawh a harsa tih leh a rang thei anga inthlanna buatsaih tum a nih thu a sawi leh bawk. VC leh LC ding laite hian sawrkarin mipui tana thawk tura a tih an tih duh loh sawi tur pakhat mah an hriat loh laiin, hmasawnna hna thawhpui atana a ding laite an thawhpui duh loh vang a ni,” a ti a. “Ngaihdan inang lo te inpawm tawn thiamna hi democracy chakna leh ropuina a nih laiin ZPM sawrkarin 'Party Bil Sawrkar' din a tumna langsar tak hi an hlawhtlinpui lohna turin kan vote hlu tak hmangin i dodal ngam ang u,” a ti bawk.

MNF Treasurer chuan ZPM sawrkarin mipui sawrkar ni lo, party sawrkar sawhngheh an tum ngawr ngawr avang hian inthlan hun pangngai pawh nghak thleng ngam lovin, tun tuma VC/LC inthlanna neih tur hi hnawh sarum takin a puang niin a sawi a, “VC/LC inthlanna, Dt. 12.02.2025-a neih turah hian Pathian leh mipuite zarah MNF Party in hnehna kan chang a nih chuan ram leh khawtlang tana thil tha leh hmasawnna tur apiangah phur tak leh tha tho taka State sawrkar leh Central sawrkar hotute thawhpui zel MNF Party chuan kan tum a, enchhin sawrkar mipui beisei pha silo tan pawh inenletna hun tha, insiamthatna hun anih hlauh theih nan mipuiin sawrkar muthlu ben harh nan i vote lo ngam ang u,” a ti bawk.