Kawnpui leh Khamrang inkar kawng siam enfiah

National Highway NH-6 Kawnpui atanga Khamrang kawng thawmthat hna thawh mek chu nimin khan PWD Minister Vanlalhlana chuan a hmunah kalin a enfiah.

Nimin-a helai kawng a enfiahna ah hian PWD Minister chuan Mizoram ei leh bar lakluhna kawngpui Vairengte atanga Sairang inkar National Highway-6 hi NHIDCL kuta awm niin engemaw hna laklawhna avangin Mizoram State sawrkar chuan mipui mamawhna hriain a enkawl lailawk ta tih a sawi a. Mizoram Sawrkarin a enkawl hnu hian a thawh khat nan he kawngpui thawmthat nan nikum lam khan cheng nuai 75 sen a lo nih tawh thu leh nikum vek December 25-a NHIDCL kuta awm leh tura ruahman a nih laiin, NHIDCL te hian an lak tak si loh avangin Mizoram Sawrkar chuan State pawisa a remchang ang ang pawt khawmin, tun thleng hian mipuite mamawhna hriain a enkawl chhunzawm leh ta rih tih a sawi a. “NH-6 thawmthat hna hi kumin January 20 atang khan a tum hnih nan thawh tan leh a ni a, tun tumah hian cheng nuai 125 ruahman niin February ni 15-a siam zawh tum a ni a, sum ruahman sa hian a daih hmel loh avangin Sawrkarah dil belh leh mek a ni a, ngawrh taka siam mek a ni,” a ti bawk.

PWD Minister chuan mipuite harsatna an hriat thu leh chumi chhawk zangkhai turin Mizoram PWD kawng enkawl ni miah lo ah mawh-phurhna an la tih sawiin, “Chuvangin mipui leh lirthei neitute pawhin Sawrkar thahnem ngaihna min hriathiam pui thin se kan duh hle a ni. Nitin a kan mamawh kan phurhluhna kawng hi mipuiten kan dim thiam a tul takzet a, a tichhetu nilo a, dimdawi taka enkawltu kan nih theuh ka beisei a ni,” a ti bawk.