Bawlhhlawh sawngbawl dan tur DC hovin sawiho

Serchhip District chhunga bawlhhlawh sawngbawl dan tur ruahmanna leh rawtna te chu nimin khan Bawrhsap Paul L. Khuma hovin sawiho a ni.

He sawihona Serchhip DC Meeting Hall-a neih ah hian Bawrhsap Paul L. Khuma chuan Serchhip District a lo fai leh hrisel zawkna tura hmalakna a hlawhtlin theih nan Official te chauh ni lovin, Serchhip District khawtlang hruaitute leh mipui mimir te mawhphurhna a sang hle a ni, a ti a. Theihtawp chhuahpuiah Serchhip District mipuite chu a sawm bawk a ni.

He thutkhawm ah hian UD&PA Joint Director C. Lalduhzuali chuan SBM (Urban) 2.0 kaltlanga Serchhip District a bawlhhlawh sawng-bawl dan tur ruahmanna te a sawi a. He huna tarlan a nih danin Thenzawl leh Serchhip-ah Solid Waste Management Centre din tum a ni a, a hmunhma sak leh siamna tur Civil Works atan Tender an tichhuak fel tawh a, North Vanlaiphai atan Tender hi tihchhuah mai hmabak niin Village Council Inthlanpui zawhfel a nih hnuah bawhzui a nih tur thu a sawi bawk.

PHE Serchhip WATSAN Division-a Senior EE Isaac Lalchhuanmawia chuan he hunah hian Fecal Slut Management leh Solid Waste Management chungchanga an hmalakna te powerpoint hmangin a tarlang a. Green Herd Pvt Limited te nena tangkawpin Lungrual ramah Solid Waste Management Plant sak mek a nih thu leh thla hnih khat hnuah hman theiha peihfel a nih tawh tur thu a sawi a. Ek paihna leh sawnbawlna hmun, Fecal Sludge Management atana ruahmanna chungchang pawh he hunah hian tarlan a ni bawk.

Nimin-a thutkhawm neih ah hian Clean Serchhip chungchang sawilan niin Additional DC Lalrinzuala chuan hemi atana ruahmanna an siam tawh leh an bawhzui dan report a pe bawk a. He hunah hian DUDO Gaston Vanlalhriatpuia, DIPRO Lalnunmawii te bakah VC leh Official dangte an tel a ni.