MUP in Larsap an kawm

Mizoram Upa Pawl (MUP) General Hqrs. hruaitute chuan nimin khan an President Nghaklianmawia hovin Larsap (Dr) VK Singh chu Raj Bhavan-ah hmuin duhsakna an hlan a. Kum upa te tana hamthatna awmte tarlangin theihtawp chhuahpui turin an ngen a. Heng bakah hian Mizo-ram hmasawn nena pawimawh hrang hrangte an sawipui bawk a ni.

Nimin vek khan NHIDCL Regional Office-a Executive Director Virendra Kumar Jakhar chuan Larsap hi hmu bawkin Mizorama NHIDCL hmalakna hrang hrangte an sawidun a. Larsap chuan project hrang hrangte hun bituk chhunga tha taka zofel thei tura tan la turin a chah a. A bikin Mizoram mamawh chak lakna kawngpui Sairang leh Silchar pawhtu National Highway siam hna chu ngaipawimawh turin a chah bawk.