Lengpui Airport zawng zawng IAF-ah hlan tum lo

Indian Airforce (IAF) kuta Lengpui Airport hlan tuma hmalakna kal mekah Airport pumpui hlan lovin thenkhat lai hlan tum a ni.

Working Committee on Lengpui Airport chuan Indian Airforce (IAF) kuta Lengpui Airport hlan chungchang ah Draft Memorandum of Agreement (MoA) an buaipui mek zel a, IAF kutah hian Airport chu a vaiin hlan vek tur a nilo a, thlawhna tlan kawng (runway) leh Air Traffic Controller te chu hlan tur zinga mi niin adang erawh Mizoram sawrkar kutah ala awm chhunzawm dawn nia thudawn a, Airport enkawl chu a hautak lutuk avangin a chhawk zangkhai theih nan Runway leh Air Traffic Controller chu IAF kutah hlan mai ni se an ti nia thudawn a ni.

Mizorama Airport awmchhun Lengpui Airport hi Aizawl khawpui atanga kilometre 30 vela hlaa awm a ni a, tun dinhmunah Airline pahnih- Indigo leh Alliance Air thlawk mekin kum khatah mi nuai 4 chuang velin an hmang tangkai anga chhut thin a ni a, sum tam tham tak lalut thin mahse a enkawlna a hautak avangin State sawrkar chuan midang kuta hlan relin hmalakna kalpui mek a ni a, amaherawhchu eptu party te leh tlawmngai pawl intelkhawm ten an duhloh thu an lo sawi tawh thung a. Hemi chungchang ah hian NGOCC bakah MNF leh Congress te chuan thuchhuah te siamin an duh loh thu hi an lo aupui tawh a ni.