Mizoram-a Thangram area rinluh a nih theih nana hmalakpui turin Chief Minister ngen

Mizo Zirlai Pawl (MZP) General Hqrs. hruaitute leh Thangram Indigenous Peoples' Movement (TIPM) hruaitu chuan nimin khan Chief Minister Lalduhoma chu a Office-ah hmuin Thangram dinhmun hrang hrang an sawiho a, Mizoram chhungah Thangram rinluh a nih theihna tura hmalak pui turin Chief Minister hi an ngen bawk.

Nimin-a Chief Minister an kawmna ah hian MZP leh Thangram hruaitute chuan Assam awp chhung Thangram area Sq. Mile 180 a zau chu Mizoram-ah rinluh a nih theih nan hmalakpui turin Mizoram Chief Minister hi an ngen a. Assam awpna hnuaia awm Zofate tan chuan Mizoram chhunga awm chu an hnam leh Sakhua tan a him berin an ring tih an hrilh bawk a. Assam awp chhung Thangram (Singla Valley leh Langkaih Valley) chu Zofate chenna a nih avangin hnam lian zawk ten an nek reng tih sawiin, Forest Reserve Area a Assam Sawrkar-in a ngaih avangin Thangram chhunga Zofate chuan In leh lo din kawngah harsatna nasa tak an tawh thin thu leh kawng tam takah harsatna an tawk tih an sawi a. Chuvangin, anmahni unaute awmna Mizoram chhungah Thangram hi rinluh an duh thu sawiin, a theih ang anga hmalakpui turin Mizoram Chief Minister hi an ngen a ni.

Chief Minister an hmuhna ah hian Adviser to Chief Minister (Political) Lalmuanpuia Punte pawh telin Chief Minister Lalduhoma chuan Thangram mipuite a hriat reng thu a lo hrilh a, An hmalakna ah tangkai theihna a neih chuan tlanchhiat a tum loh thu a lo hrilh bawk a ni.

Assam sawrkar awpna hnuaia awm Zofate chuan harsatna tam tak an tawh avangin Thangram Indigenous Peoples' Movement (TIPM) hi dinin kum 2020 atangin Assam awp chhunga Zofate chenna, Thangram area Sq. Miles 180 chu hnam lian zawkte laka a him zawk nan leh an hnam puite nen rorelna pakhat hnuaia an awm theih nan Mizoram State hnuaia rihluh phutin hma an la chho a ni. Hemi kawngah hian a theih ang anga hmala in India Prime Minister hnenah pawh Memorandum an lo thehlut tawh a. Assam sawrkar pawh vawi tam tak an lo sawipui tawh a. MZP nen kawng hrang hranga thawkho in, Thangram mipuite hmasawn nan leh Zofate inpumkhat nan hmalakho zel an tum a. Thangram Indeginous Peoples Movement (TIPM)-ah hian Zofate - Sakachep, Chorei, Hrangkhawl, Molsom leh Ranglong te awmin Mizoram chhung Kanhmun piah hnaite a awm an ni.