Kum 6-14 zinga 98.7% te School-ah ziaklut

Mizoram School hrang hrangah kum 6 atanga kum 14 inkar za zela 98.7 chu School-ah ziahluh an ni.

Annual Status of Education Report (ASER) in ramchhunga School hrang hrang Survey a neih atanga tarlan danin Mizoram-ah kum 2024-a chhinchhiah danin naupang kum 6 atanga kum 14 inkar za zela 98.7 chu zirna In-ah an hming ziahluh a ni a. Covid-19 hripui len hnuah Private School hrang hranga naupang lut te an tlahniam nasa hle a, Private School-a naupang ziahluh zat hi naupang School lut zawng zawng atanga chhutin zaa 40% a ni. Mizoram zirna In hrang hranga zirlai ten kum 2022 atanga kum 2024 inkarah lehkhabu chhiar an tui thar hle a, endikna atanga a lan danin Mizoram-a zirlai te chu Arithmetic lamah thiam tak an ni tih hmuhchhuah a ni bawk. Naupang kum 15 leh kum 16 zingah za zela 15.3% in School an bansan tih he report-ah hian tarlan niin kum 2024-ah zirlai attendance chu 90.3% a ni bawk.

ASER hian Mizoram District 7-a khaw 197-ah Survey hi neiin hetah hian In hrang hrang 4132-ah te lutin naupang 7483 te chu thu zawhfiah a ni a, naupangte hi a hranpa a kawm vek niin zawhna inang leh tihtur inang chu an dawng vek a, heta tang hian rampum dinhmun thlirin Mizorama zirna In hrang hrangah hmasawnna a awm zel tih hmuhchhuah a ni bawk.