Road Safety Month hmang dawn

Kumdang-a lo hman tawh thin angin ‘Road Safety Month’ chu February 2025 chhung hian Mizoram hmundangte rualin Serchhip District-ah pawh hman leh a ni dawn.

Serchhip District-a Road Safety Month hman dan tur hi nimin khan District Road Safety Committee chuan an Chairman leh Bawrhsap Paul L. Khuma hovin Serchhip DC Meeting Hall-ah an rel a, ruahman dan chuan Road Safety Month hawnna inkhawm hi February ni 4 (Thawhlehni) khian Serchhip DC Pisapui Hall-ah hman a ni dawn a. He hunah hian lirthei khalh fimkhur a tulzia te, sawrkar dan leh hremna awm thei te leh a kaihhnawih thil dangte inzirtirin hun hman a ni dawn a. February ni 28-ah a kharna neih a ni ang.

February thla chhung hian lirthei khalhtu ten dan an zawm leh zawm loh endikin mipuite Traffic chungchanga an fimkhur a, an him zawk theih nan ‘No Tolerance Month’ hman nghal a ni anga, Traffic Police duty-naa tawiawm turin NCC te sawmin Awareness zau zawka pek a nih theih nana hmalak dan turte ruahman a ni bawk.