Scholarship sem theih a la ni lo tih sawi

Mizoram-a zirlaite hnena Scholarship thawh thumna (3rd installment) tur chu Central sawrkar, Ministry of Tribal-in Mizoram sawrkar hnenah pawisa an la rawn pek loh avângin sem theih a la ni lo tih MZP chuan an sawi.

MZP General Hqrs. hruaitute chuan Scholarship la nghak mek te atanga zawhna an dawn nasat avangin January 24, 2025 khan Mizoram Scholarship Board hotute thil awmdan an zawhfiah thu leh 2nd Installment sem zawh a nih khan UC leh lehkha pawimawh tihfel ngaite thehluh nghal ni mahse, Central lamin pawisa an la rawn pe thei lo niin an sawi a. Pawisa dawn a nih veleh sem nghal a nih tur thu leh Zirlaite dawh thei taka nghak hram hram tura an ngen thu an tarlang a ni.

MZP thuchhuah in an tarlan danin Post Matric Scholarship (2023-2024) hi zirlai 31,685-in dilin zirlai 26,670 pek an ni tawh a, la dawng lo zirlai 5,015 an awm mek a. Heng zinga zirlai 3,981 te chu sum awm veleh pek nghal tur niin Zirlai 1,034 te chu pending mek an ni a, Zirlai 898 te erawh Aadhar seeding loh avang leh chhan dang dang avangin Reject list-ah an awm thung a. Tun thlenga Scholarship sem tawh hi a vaiin cheng nuai 3,471.91 niin heng atanga 10% (cheng nuai 345.84) chu Mizoram sawrkar-in a tum (State Matching Share) a ni.