Serchhip-ah FOCUS Project kharna leh an hmalakna inhlanchhawnna hun hman a ni

Fostering Climate Resilient Upland Farming System (FOCUS) Project chu a lo tawp dawn tak avangin nimin khan Serchhip-ah FOCUS Exit Strategy Meeting neiin kuthnathawktute tana FOCUS Project hnuaia hmalakna hrang hrangte chu Farmer Interest Group (FIG) te hnenah hlan a ni.

Serchhip DC Pisapui Hall-ah FOCUS Exit Strategy Meeting hi Serchhip DC leh District Level Co-Ordination Committee on FOCUS-a Chairman Paul L. Khuma chuan telpuiin FOCUS Project kalpui a nih chhunga Serchhip District khaw hrang hranga hmasawnna thleng chanchin chi 65 zet ngaihthlak tur a awm chu lawmawm a tih thu leh thingtlang Loneih bansana lo hmun nghet neia inlet ta farmer engemawzat an awm chu FOCUS hlawhtlinna pholangtu a nih thu a sawi a. FOCUS Project chuan farmer te tan hmasawnna ruhrel rotling engemawzat a hnutchhiah tawh a, tunah chuan he project hi a lo tawp dawn tak avangin a enkawl zui hna chu a neitu dik tak Loneitute kutah a awm tawh dawn a, theihtawp chhuaha tan an lak chhunzawm a ngai dawn thu a sawi a ni. Bawrhsap Paul L.Khuma chuan Economic Survey-a a lan danin kum 2008-09 ah Mizoram chhunga Agriculture leh a kaihhnawiha eizawngtute chuan State GDP za zelah 14 chauh an hauh phak laiin kum 2022-23 ah erawh chuan 20.15% ah an inhlangkai tih sawiin, hei hian Sawrkar laipui leh State Sawrkar hrang hrangte hmalakna a hlawhchham lo tih a nemnghet, a ti.

Nimin-a he hun hman hi FOCUS Serchhip District-a District Project Manager K. Laltlanmawia chuan kaihruaiin Agriculture Department-a Deputy Director (FOCUS) Lalhmingmuana chuan FOCUS chu zawhfel a nih tawh thu leh he hmalakna kalpui chhunzawm zel tura sawrkar in ruahmanna a siam dan te a tarlang a. Lead Farmer aiawhin Sialsir VCP Vanlalrema chuan an khua in FOCUS an kalpui dan leh hemi atanga hlawhtlinna an hmuh dan leh hmalakna kalpui zel an tum dan te a sawi bawk a ni.

He huna tarlan a nih danin FOCUS (Fostering Climate Resilient Upland Farming Systems in the North East) hi Externally Aided Project (EAP) hmanga thawh niin UNO hnuaia peng pakhat, International Fund for Agricultural Development (IFAD) atanga loan hmuh atanga kalpui a ni a, IFAD hian Mizoram tan Project siamin loan an pe a, he loan hi za zela 90 chu sawrkar laipui in rulin zaa 10 chu State sawrkar in a rulh a ni thung a. He Project hi January 25, 2018 khan Mizoram-ah kum 5 chhunga kalpui tura hawn ni mah se Inthlanpui neih kum a nih avangin duh anga hmalakna kalpui theih a ni lo a, kum 2019-ah thawktute la-a hmalak a ni leh chungin kum 2020-ah hri leng avangin hmalakna kalpui theih a ni lo leh a. Kum 2021 kumtawp lamah mumal zawka kalpui chhoh niin nikum March thla khan he Project hi tawp tur ni mah se chhan hrang hrang avang hian kumin January thla thleng hian pawhsei a ni a, tunah hian he Project hi a tawp dawn tak avangin a thlahna leh Project inhlanna hun hi buatsaih a ni.

FOCUS Project hnuaia hmalakna hian tum bik pahnih neiin kuthnathawktute sum lakluh tihpun leh thingtlang loneih zawi zawia bansan-a huan nghet nei tura hmalak te a ni a, Serchhip District chhungkaw khaw hrang hrang ah hmalakna kalpui niin Farmer Interest Group (FIG) 351 dinin hetah hian Farmer 5745 an inziaklut a, kut hnathawktute tan hian an mamawh thlai chi, bungrua leh an Huan leh leilet tihchangtlunna bakah an tharchhuah tihral leh sawngbawlna kawng ah te pawh hmalakna hi an kalpui bawk a. Heng an hmalakna te hi nimin-a hun hman ah hian FIG te hnenah hlan niin heng an hlan te zingah hian Check dam, Water Tank, Agriculture Link Road, Horticulture Link Road, Farm Link Road,  Ran chaw siamna Mini Feed Mill, Nursery, Lei (bridge), Water Harvesting Structure leh a dangte a tel a ni.